ಮಾವ ಮಂಚಕ್ಕೆ ಕರೆದ್ರೆ, ಗಂಡ ಹೋಗು ಅಂದನಂತೆ-ಕಾಮುಕರ ವಿರುದ್ಧ ನೊಂದ ಮಹಿಳೆ ದೂರು

ತುಮಕೂರು: ಮಾವನೊಬ್ಬ ಮಗಳಂತಿರುವ ಸೊಸೆಯನ್ನು ಮಂಚಕ್ಕೆ ಕರೆದಿರುವ ಅಮಾನವೀಯ ಘಟನೆ ಜಿಲ್ಲೆಯ ಕುಣಿಗಲ್ ತಾಲೂಕಿನ ಇಪ್ಪಾಡಿ ಗ್ರಾಮದಲ್ಲಿ ನಡೆದಿದೆ.

ಚಂದ್ರಯ್ಯ ಎಂಬಾತನೇ ಸೊಸೆಯನ್ನ ಮಂಚಕ್ಕೆ ಕರೆದ ಕಾಮುಕ ಮಾವ. ಮಾವನ ಕಾಮದಾಟವನ್ನು ಹೋಗಿ ಪತಿ ಪ್ರಭಾಕರ್‍ನಿಗೆ ತಿಳಿಸಿದ್ರೆ ಅವನೂ ಸ್ವಲ್ಪ ಅಡ್ಜಸ್ಟ್ ಮಾಡಿಕೋ ಎಂದು ಹೇಳಿದ್ದಾನೆ.

ಪ್ರಭಾಕರ್ ಮೂರು ತಿಂಗಳ ಹಿಂದೆ ಮೈಸೂರು ಮೂಲದ ಗೀತಾ (ಹೆಸರು ಬದಲಾಯಿಸಿದೆ) ಎಂಬವರನ್ನು ಮದುವೆಯಾಗಿದ್ದನು. ಮದುವೆ ವೇಳೆ ಗೀತಾ ಪೋಷಕರು ವರದಕ್ಷಿಣೆ, ವರೋಪಚಾರ ಎಂದು ಲಕ್ಷಾಂತರ ರೂಪಾಯಿ ಖರ್ಚು ಮಾಡಿದ್ದರು.

ಇತ್ತ ಮದುವೆಯಾದ ಮೂರು ತಿಂಗಳು ಆಗುವಷ್ಟರಲ್ಲಿ ಪತಿ ಪ್ರಭಾಕರ, ಮಾವ ಚಂದ್ರಯ್ಯ, ಅತ್ತೆ ಸಂತೋಷಮ್ಮ ವರದಕ್ಷಿಣೆ ಕಿರುಕುಳ ಕೊಡಲು ಆರಂಭಿಸಿದ್ದಾರೆ. ಕೊನೆಗೆ ಮಾವ ಚಂದ್ರಯ್ಯ ಸೊಸೆ ಗೀತಾಳಿಗೆ ತನ್ನ ಜೊತೆ ಹಾಸಿಗೆ ಹಚಿಕೊಳ್ಳುವಂತೆ ಒತ್ತಾಯಿಸಿದ್ದಾನೆ. ಸ್ವತಃ ಗಂಡ ಪ್ರಭಾಕರ್ ಹಾಗು ಅತ್ತೆ ಇದಕ್ಕೆ ಕುಮ್ಮಕ್ಕೂ ನೀಡಿದ್ದಾರೆ ಎಂದು ಗೀತಾ ಆರೋಪ ಮಾಡಿದ್ದಾರೆ.

ಸ್ನಾನ ಮಾಡುವುದನ್ನ ಬಗ್ಗಿ ನೋಡುತ್ತಿದ್ದ ಮಾವ: 55 ವರ್ಷದ ಮಾವ ಚಂದ್ರಯ್ಯ ಮನೆಯಲ್ಲಿ ಯಾರು ಇಲ್ಲದಿದ್ದಾಗ ಗೀತಾ ಸ್ನಾನ ಮಾಡುವಾಗ ಹೋಗಿ ಬಗ್ಗಿ ನೋಡುವುದು. ಬಾತ್ ರೂಂ ಒಳಗೆ ಹೋಗಿ ಮೈ ಮುಟ್ಟುವುದನ್ನು ಮಾಡುತಿದ್ದಾನಂತೆ. ಇನ್ನೂ ಚಂದ್ರಯ್ಯ ಟೈಂ ಸಿಕ್ಕಾಗೆಲ್ಲ ಸೊಸೆಯ ಕೈ ಹಿಡಿದು ನನಗೆ ಸಪೋರ್ಟ್ ಮಾಡು ಎಂದು ಹಿಂಸೆ ಕೊಡುತ್ತಿದ್ದನು.

ಕೊನೆಗೆ ಗೀತಾ ಕಾಮುಕ ಮಾವನ ಮಾತುಗಳನ್ನು ಮೊಬೈಲ್ ಫೋನ್‍ನಲ್ಲಿ ರೆಕಾರ್ಡ್ ಮಾಡಿದ್ದಾರೆ. ಈ ಸಂಬಂಧ ಗೀತಾ ತನ್ನ ಅತ್ತೆ, ಮಾವ, ಮೈದುನ, ಅತ್ತಿಗೆ ಹಾಗು ಗಂಡನ ವಿರುದ್ಧ ಕುಣಿಗಲ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಇತ್ತ ದೂರು ದಾಖಲಾಗುತ್ತಿದ್ದಂತೆ ಐವರು ನಾಪತ್ತೆಯಾಗಿದ್ದಾರೆ.