ಕಾರಿನಲ್ಲಿ ಕರೆದೊಯ್ದು ಮಹಿಳೆ ಮೇಲೆ 23 ಮಂದಿಯಿಂದ ಗ್ಯಾಂಗ್‍ರೇಪ್

ಜೈಪುರ: ದೆಹಲಿ ಮೂಲದ ಮಹಿಳೆ ಮೇಲೆ 23 ಜನರು ಗ್ಯಾಂಗ್‍ರೇಪ್ ಎಸಗಿರುವ ಘಟನೆ ರಾಜಸ್ಥಾನದ ಬಿಕನರ್ ಜಿಲ್ಲೆಯಲ್ಲಿ ನಡೆದಿದೆ.

ದೆಹಲಿ ಮೂಲದ ಮಹಿಳೆ ರಾಜಸ್ಥಾನದ ಬಿಕನರ್ ನಗರದಲ್ಲಿ ತಾನು ಖರೀದಿಸಿದ್ದ ಸೈಟ್‍ಅನ್ನು ನೋಡಲು ಸೆಪ್ಟೆಂಬರ್ 25 ರಂದು ಬಂದಿದ್ದ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ. ಸೈಟ್ ನೋಡಿ ವಾಪಸ್ ದೆಹಲಿಗೆ ಹೋಗಲು ಸಾರಿಗೆ ಬಸ್‍ಗೆ ಕಾಯುತ್ತಿದ್ದ ಸಂದರ್ಭದಲ್ಲಿ ಕಾರಿನಲ್ಲಿ ಬಂದ ಇಬ್ಬರು ಮಹಿಳೆಗೆ ಲಿಫ್ಟ್ ಕೊಡುವುದಾಗಿ ಹೇಳಿದ್ದಾರೆ. ಲಿಫ್ಟ್ ಗೆ ಒಪ್ಪದಕ್ಕೆ ಬಲವಂತವಾಗಿ ಕಾರಿನೊಳಗೆ ಎಳೆದುಕೊಂಡು ಇಬ್ಬರು ಅತ್ಯಾಚಾರ ಎಸಗಿದ್ದಾರೆ. ನಂತರ ಮತ್ತೆ 6 ಮಂದಿಗೆ ಕರೆ ಮಾಡಿ ಕರೆಸಿ ಅವರಿಂದಲೂ ಅತ್ಯಾಚಾರ ಮಾಡಿಸಿದರು ಎಂದು ಸಂತ್ರಸ್ತೆ ಮಹಿಳೆ ದೂರಿನಲ್ಲಿ ತಿಳಿಸಿದ್ದಾರೆ.

ಇದಾದ ಬಳಿಕ ಪಲಾನಾ ಗ್ರಾಮಕ್ಕೆ ಕರೆದೊಯ್ದು ಅಲ್ಲಿ ಹಲವು ವ್ಯಕ್ತಿಗಳು ಸೇರಿ ನನ್ನ ಮೇಲೆ ಪದೇ ಪದೇ ಅತ್ಯಾಚಾರ ನಡೆಸಿದ್ದಾರೆ ಎಂದು ಸಂತ್ರಸ್ತೆ ಪೊಲೀಸರ ಬಳಿ ಹೇಳಿದ್ದಾರೆ.

ಸಂತ್ರಸ್ತೆ ಮಹಿಳೆಯ ದೂರಿನ ಪ್ರಕಾರ, ಅತ್ಯಾಚಾರ ನಡೆಸಿದ ಮರು ದಿನ ಸೆ.26 ರಂದು ಕರೆದೊಯ್ದ ಜಾಗದಲ್ಲೇ ಬಿಟ್ಟು ಪರಾರಿಯಾಗಿದ್ದಾರೆ. ಅತ್ಯಾಚಾರ ಮಾಡಿದ ಆರೋಪಿಗಳ ವಿರುದ್ದ ಎಫ್‍ಐಆರ್ ದಾಖಲಾಗಿದೆ.

ಅಪರಿಸಿದ ಇಬ್ಬರು ಆರೋಪಿಗಳನ್ನು ರಾಜು ಮತ್ತು ಶುಭಾಂಶ್ ಎಂದು ಗುರುತಿಸಿದ್ದು, ಆರೋಪಿಗಳನ್ನು ಬಂಧಿಸಲಾಗಿದೆ. ಉಳಿದ 21 ಅಪರಿಚಿತರ ಮೇಲೆ ದೂರು ದಾಖಲಾಗಿದೆ ಎಂದು ಬಿಕನರ್ ಪೊಲೀಸರು ತಿಳಿಸಿದ್ದಾರೆ.