ತಾಯಿಯನ್ನ ಕೊಂದು ಆತ್ಮಹತ್ಯೆಗೆ ಶರಣಾದ ಪುತ್ರ

ನವದೆಹಲಿ: ತಾಯಿಯನ್ನು ಕೊಲೆಗೈದು ಪುತ್ರ ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ದೆಹಲಿಯ ಪಿತಂಪುರ ವ್ಯಾಪ್ತಿಯಲ್ಲಿ ನಡೆದಿದೆ. ತಾಯಿಯ ಶವ ಆಶಿನಾ ಅಪಾರ್ಟ್‍ಮೆಂಟಿನ ಫ್ಲ್ಯಾಟ್ ನಲ್ಲಿ ದೊರೆತಿದ್ದು, ಪುತ್ರನ ಶವ ಸರೈ ರೇಲ್ವೇ ನಿಲ್ದಾಣದ ಬಳಿಯ ಟ್ರ್ಯಾಕ್ ನಲ್ಲಿ ಸಿಕ್ಕಿದೆ.

ದೆಹಲಿಯ ಸೇಂಟ್ ಸ್ಟೆಫನ್ ಕಾಲೇಜಿನ ಉಪನ್ಯಾಸಕ ಅಲನ್ ಸ್ಟೇನ್ಲಿ ತಾಯಿಯನ್ನು ಹತ್ಯೆಗೈದು ಆತ್ಮಹತ್ಯೆಗೆ ಶರಣಾದ ಪುತ್ರ. ಮನೆಯಲ್ಲಿ ಮೊದಲು ತಾಯಿಯನ್ನು ಕೊಂದು ಶವವನ್ನು ಫ್ಯಾನಿಗೆ ನೇತು ಹಾಕಿದ್ದಾನೆ. ತದನಂತರ ತಾನು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂದು ಪೊಲೀಸರ ಪ್ರಾಥಮಿಕ ತನಿಖೆಯಲ್ಲಿ ತಿಳಿದು ಬಂದಿದೆ ಎಂದು ವರದಿಯಾಗಿದೆ.

ಅಲನ್ ಸ್ಟೇನ್ಲಿ ಕೇರಳ ಮೂಲದವನಾಗಿದ್ದು, ಕಳೆದ ಒಂದೂವರೆ ವರ್ಷದಿಂದ ದೆಹಲಿಯ ಪಿತಂಪುರದಲ್ಲಿ ವಾಸವಾಗಿದ್ದನು. ಅಲನ್ ದೆಹಲಿಯ ಐಐಟಿಯಲ್ಲಿ ಪಿಎಚ್ ಡಿ ಪದವಿಯನ್ನು ಪಡೆದುಕೊಂಡಿದ್ದನು. ಏಳು ತಿಂಗಳಿನಿಂದ ತಾಯಿ ಸಹ ಆತನೊಂದಿಗೆ ವಾಸವಾಗಿದ್ದರು. ಎರಡು ಮೃತ ದೇಹಗಳನ್ನು ಮರಣೋತ್ತರ ಶವ ಪರೀಕ್ಷೆಗಾಗಿ ಆಸ್ಪತ್ರೆಗೆ ರವಾನಿಸಲಾಗಿದೆ.

ಕೇರಳದಲ್ಲಿರುವ ಆಲನ್ ಸಂಬಂಧಿಕರಿಗೆ ಪೊಲೀಸರು ವಿಷಯವನ್ನು ತಿಳಿಸಿದ್ದರು. ಆದರೆ ಕೊಲೆಗೆ ನಿಖರ ಕಾರಣ ತಿಳಿದು ಬಂದಿಲ್ಲ. ಪೊಲೀಸರು ನೆರೆಹೊರೆಯವರಿಂದ ಮಾಹಿತಿಯನ್ನು ಪಡೆದುಕೊಳ್ಳುತ್ತಿದ್ದು, ಎಲ್ಲಾ ಆಯಾಮಗಳಲ್ಲಿಯೂ ತನಿಖೆ ನಡೆಸುತ್ತಿದ್ದಾರೆ.