ಮುಂಬೈ: ಮೌಲ್ವಿಯೊಬ್ಬ ಮೊಬೈಲ್‍ನಲ್ಲಿ ಅಶ್ಲೀಲ ವಿಡಿಯೋ ತೋರಿಸಿ 12 ವರ್ಷದ ಅಪ್ರಾಪ್ತೆ ಮೇಲೆ ಅತ್ಯಾಚಾರ ಎಸಗಿದ್ದು, ಮತ್ತೊಬ್ಬ ಅಪ್ರಾಪ್ತೆಗೂ ಲೈಂಗಿಕ ಕಿರುಕುಳ ನೀಡಿರುವ ಘಟನೆ ಮಹಾರಾಷ್ಟ್ರದ ನಾಂದೇಡದಲ್ಲಿ ನಡೆದಿದೆ.
ಆರೋಪಿಯನ್ನು ಮಜಲ್‍ಗಾಂವ್ ಗ್ರಾಮದಲ್ಲಿನ ಮೌಲ್ವಿ ಸಬೆರ್ ಫರೂಕಿ ಎಂದು ಗುರುತಿಸಲಾಗಿದ್ದು, ಈ ವಿಚಾರ ಬೆಳಕಿಗೆ ಬರುತ್ತಿದ್ದಂತೆ ಮೌಲ್ವಿ ಪರಾರಿಯಾಗಿದ್ದಾನೆ. ಆರೋಪಿ ವಿರುದ್ಧ ದೂರು ನೀಡದಂತೆ ಅದೇ ಗ್ರಾಮದ ಮೂವರು ರಾಜಕಾರಣಿಗಳು ಸಂತ್ರಸ್ತೆಯ ತಾಯಿಗೆ ಒತ್ತಾಯಿಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.
ಈ ಹಿನ್ನೆಲೆಯಲ್ಲಿ ಮೂವರು ರಾಜಕಾರಣಿಗಳಾದ ಖಲೀಲ್ ಪಟೇಲ್, ನವಾಬ್ ಪಟೇಲ್ ಮತ್ತು ಐಬ್ರಿಶ್ ಬಗ್ವಾನ್ ನನ್ನು ಪೊಲೀಸರು ಬಂಧಿಸಿದ್ದಾರೆ. ನವಾಬ್ ಪಟೇಲ್ ನಾಂದೇಡ್ ನಗರ ಘಟಕದ ಮಾಜಿ ಅಧ್ಯಕ್ಷನಾಗಿದ್ದನು. ಬಗ್ವಾನ್ ಮಜಲ್‍ಗಾಂವ್ ನ ತಾಲೂಕು ಅಧ್ಯಕ್ಷನಾಗಿದ್ದ. ಖಲೀಲ್‍ಪಟೇಲ್ ಮಾಜಿ ಕೌನ್ಸಿಲರ್ ಆಗಿದ್ದನು ಎಂದು ತಿಳಿದು ಬಂದಿದೆ.
ಕೆಲವು ದಿನಗಳ ಹಿಂದೆ ನಾಂದೇಡದ ಡಿಗ್ಲರ್ ನಾಕದಲ್ಲಿನ ಇಸ್ಲಾಮಿಯಾ ಅರೇಬಿಯಾ ಸೆಮಿನರಿಯಲ್ಲಿ ಬಾಲಕಿಯ ಮೇಲೆ ಫರೂಕಿ ಅತ್ಯಾಚಾರ ಎಸಗಿದ್ದಾನೆ. ಮರಾಠವಾಡ ಪ್ರದೇಶದ ಅನೇಕ ಹೆಣ್ಣು ವಿದ್ಯಾರ್ಥಿಗಳು ಮದ್ರಸಾದಲ್ಲಿ ಅಧ್ಯಯನ ನಡೆಸುತ್ತಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಆರೋಪಿ ತನ್ನ ಮೊಬೈಲ್ ಫೋನ್‍ನಲ್ಲಿ ಅಶ್ಲೀಲ ವಿಡಿಯೋ ತೋರಿಸಿ 12 ವರ್ಷದ ಬಾಲಕಿ ಮೇಲೆ ಅತ್ಯಾಚಾರ ಎಗಿದ್ದಾನೆ. ಅಷ್ಟೇ ಅಲ್ಲದೇ 8 ವರ್ಷದ ಮತ್ತೊಬ್ಬ ಹುಡುಗಿಗೂ ಲೈಂಗಿಕ ಕಿರುಕುಳ ನೀಡಿದ್ದಾನೆ. ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ಮಾಡಲು ವಿಶೇಷ ತನಿಖಾ ತಂಡ(ಎಸ್‍ಐಟಿ) ನೇಮಿಸಲಾಗಿದೆ.
ಆರೋಪಿಯ ವಿರುದ್ಧ ಮತ್ತಷ್ಟು ದೂರುಗಳನ್ನು ದಾಖಲಿಸಬಹುದಾಗಿದೆ. ಪೊಲೀಸರು ಮದ್ರಸಾದಿಂದ ದಾಖಲೆಗಳನ್ನು ವಶಪಡಿಸಿಕೊಂಡಿದ್ದಾರೆ ಹಾಗೂ ತಂಡಗಳು ಆರೋಪಿಯ ಪತ್ತೆಗಾಗಿ ಬಲೆ ಬೀಸಿದ್ದಾರೆ ಎಂದು ಎಸ್‍ಐಟಿ ಮುಖ್ಯಸ್ಥೆ ಸುನೀತಾ ಬೋರ್ ಗಾಂವ್ಕರ್ ಹೇಳಿದ್ದಾರೆ.
ಈ ವಿಚಾರದ ಬಗ್ಗೆ ಸಂತ್ರಸ್ತೆಯ ತಾಯಿಯೊಂದಿಗೆ ಆರೋಪಿ ಫರೂಕಿ ರಾಜಿ ಮಾಡಿಕೊಳ್ಳುವಂತೆ ಮಾತನಾಡಲು ಬಂದಿದ್ದ. ಆದ್ರೆ ಸ್ಥಳೀಯ ಯುವಕ ಆತನಿಗೆ ಥಳಿಸಿದ್ದರು ಎಂದು ವರದಿಯಾಗಿದೆ.
Leave a Reply