ಮೆಟ್ರೋ ರೈಲು ಬರ್ತಿದ್ದಂತೆ ಟ್ರ್ಯಾಕ್ ಮೇಲೆ ಜಿಗಿದ!

ನವದೆಹಲಿ: ವ್ಯಕ್ತಿಯೋರ್ವ ಮೆಟ್ರೋ ರೈಲು ನಿಲ್ದಾಣಕ್ಕೆ ಬರುತ್ತಿದ್ದಂತೆ ಟ್ರ್ಯಾಕ್ ಮೇಲೆ ಜಿಗಿದಿದ್ದಾನೆ. ಇಂದು ಬೆಳಗ್ಗೆ ಗಾಜಿಯಾಬಾದ್ ಜಿಲ್ಲೆಯ ಕೌಶಂಬಿ ನಿಲ್ದಾಣದಲ್ಲಿ ಈ ಘಟನೆ ನಡೆದಿದ್ದು, ವ್ಯಕ್ತಿ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ.

ವ್ಯಕ್ತಿ ಟ್ರ್ಯಾಕ್ ಮೇಲೆ ಜಿಗಿಯುತ್ತಿದ್ದಂತೆ ರೈಲನ್ನು ತಕ್ಷಣವೇ ನಿಲ್ಲಿಸಲಾಗಿತ್ತು. ಈ ವೇಳೆ ವ್ಯಕ್ತಿ ಮಹಿಳಾ ಬೋಗಿ ಮತ್ತು ಹಿಂದಿನ ಬೋಗಿಯ ಮಧ್ಯೆ ಸಿಲುಕಿಕೊಂಡಿದ್ದನು. ಕೂಡಲೇ ಮೆಟ್ರೋ ನಿಲ್ದಾಣದ ಸಿಬ್ಬಂದಿ ಆತನನ್ನು ಮೇಲೆಕ್ಕೆತ್ತಿದ್ದಾರೆ. ಬೆಳಗ್ಗೆ ಆಫೀಸ್ ಸಮಯವಾಗಿದ್ದರಿಂದ ಮೆಟ್ರೋ ನಿಲ್ದಾಣ ಪ್ರಯಾಣಿಕರಿಂದ ತುಂಬಿತ್ತು. ಈ ವೇಳೆ ವ್ಯಕ್ತಿ ಪ್ಲಾಟ್ ಫಾರಂನಿಂದ ಟ್ರ್ಯಾಕ್ ಮೇಲೆ ಜಿಗಿದಿದ್ದಾನೆ. ಸದ್ಯ ವ್ಯಕ್ತಿಯನ್ನು ಡಿಎಂಆರ್ ಸಿ ಸಿಬ್ಬಂದಿ ವಶಕ್ಕೆ ಪಡೆದುಕೊಂಡಿದ್ದು, ಯಾವುದೇ ಪ್ರತಿಕ್ರಿಯೆಯನ್ನು ನೀಡಿಲ್ಲ.

ಈ ಅವಘಡದಿಂದ ಮೆಟ್ರೋ ರೈಲು 7 ನಿಮಿಷ ನಿಲ್ದಾಣದಲ್ಲಿ ನಿಂತಿದ್ದರಿಂದ ಸಂಚಾರದಲ್ಲಿ ವ್ಯತ್ಯಯ ಉಂಟಾಗಿತ್ತು. ಈ ಸಂಬಂಧ ಟ್ವೀಟ್ ಮಾಡಿದ ಡಿಎಂಆರ್ ಸಿ, ನೀಲಿ ಮಾರ್ಗದ ಕೌಶಂಬಿ ಟ್ರ್ಯಾಕ್ ಮೇಲೆ ವ್ಯಕ್ತಿ ಜಿಗಿದಿದ್ದರಿಂದ ಯುಮನಾ ಬ್ಯಾಂಕ್ ಮತ್ತು ವೈಶಾಲಿ ನಿಲ್ದಾಣದಲ್ಲಿ ಸೇವೆಯ ವಿಳಂಬವಾಗಲಿದೆ ಎಂದು ಪ್ರಯಾಣಿಕರಿಗೆ ತಿಳಿಸಿದೆ.

ಕೆಲ ಪ್ರಯಾಣಿಕರ ಪ್ರಕಾರ ವ್ಯಕ್ತಿ ರೈಲು ಹತ್ತಲು ನಿಂತಿದ್ದ. ಕಾಲು ಜಾರಿದ್ದರಿಂದ ಆತ ಟ್ರ್ಯಾಕ್ ಮೇಲೆ ಬಿದ್ದ ಎಂದು ಹೇಳಿದ್ದಾರೆ. ಈ ಸಂಬಂಧ ಅಧಿಕಾರಿಗಳು ವ್ಯಕ್ತಿಯನ್ನು ವಿಚಾರಣೆಗೆ ಒಳಪಡಿಸಿದ್ದಾರೆ.

Blue Line Update

Delay in services between Yamuna Bank and Vaishali due to a person on track at Kaushambi.

— Delhi Metro Rail Corporation (@OfficialDMRC) May 15, 2019