ಕಾಫಿ ಕುಡಿದರೆ ಧೈರ್ಯ ಬರುತ್ತೆ – 4 ದಿನ ಒಂದೇ ಮನೆಯಲ್ಲಿ ಕುಳಿತ ಅಜ್ಜಿ

ಬೆಳಗಾವಿ: ಮಹಾಮಳೆಗೆ ಉತ್ತರ ಕರ್ನಾಟಕ ನಲುಗಿ ಹೋಗಿದೆ. ಈ ಪ್ರವಾಹಕ್ಕೆ ಸಿಕ್ಕ ಅಜ್ಜಿಯೊಬ್ಬರು ಕೇವಲ ಕಾಫಿ ಕುಡಿಯುತ್ತ ನಾಲ್ಕು ದಿನ ಒಬ್ಬರೇ ಒಂದು ಮನೆಯಲ್ಲಿ ಬದುಕುಳಿದಿದ್ದಾರೆ.

75 ವರ್ಷದ ಸುಮಿತ್ರಾ ಪಾಟೀಲ್ ತಮ್ಮ ಒಬ್ಬರೇ ಇದ್ದಾಗ ಮಲಪ್ರಭಾ ನದಿಯ ನೀರು ಮನೆಯನ್ನು ಸುತ್ತುವರಿದಿದೆ. ಈ ವೇಳೆ ಹೆದರದ ಅಜ್ಜಿ ದಿನ ಕೇವಲ ಕಾಫಿ ಕುಡಿದುಕೊಂಡು 4 ದಿನ ಜೀವನ ಮಾಡಿದ್ದಾರೆ.

ತಾನು ನಾಲ್ಕು ದಿನ ಹೇಗೆ ಬದುಕಿದೆ ಎಂಬುದನ್ನು ತುಂಬ ಖುಷಿಯಿಂದ ಪಬ್ಲಿಕ್ ಟಿವಿ ಜೊತೆ ಹಂಚಿಕೊಂಡಿರುವ ಅಜ್ಜಿ, ಕಾಫಿ ಕುಡಿದರೆ ನನಗೆ ಧೈರ್ಯ ಬರುತ್ತದೆ. ಒಂದು ಕಪ್ ಕಾಫಿ ಕುಡಿದು ಒಂದು ಮಾಳಿಗೆ ಮೇಲೆ ಹೋಗಿದ್ದೆ. ಇನ್ನೊಂದು ಕಪ್ ಕಾಫಿ ಕುಡಿದು ಮತ್ತೊಂದು ಮಾಳಿಗೆ ಮೇಲೆ ಹೋಗಿ ಬದುಕುಳಿದೆ. ಈ ಸಮಯದಲ್ಲಿ ಮನೆ ಅಕ್ಷರಶಃ ನಡುಗಡ್ಡೆಯಾಗಿತ್ತು ಎಂದು ಹೇಳಿದ್ದಾರೆ.

ನಾಲ್ಕು ದಿನವಾದರೂ ಯಾರು ರಕ್ಷಣೆಗೂ ಬರಲಿಲ್ಲ. ರಕ್ಷಣೆಗಾಗಿ ನಾನು ಯಾರನ್ನೂ ಕೂಗಲಿಲ್ಲ. ನಾನು ಕಾಫಿ ಕುಡಿಯುತ್ತೇನೆ ನನಗೆ ಧೈರ್ಯ ಜಾಸ್ತಿ. ನೀರು ಬರುತ್ತಿರುವುದನ್ನು ನೋಡಿ ಮತ್ತೆ ಮಂಚದ ಮೇಲೆ ಕುಳಿತೆ ಪ್ರಕೃತಿ ಮುನಿಸಿಕೊಂಡರೆ ಮಾನವರು ಏನು ಮಾಡಲು ಆಗುವುದಿಲ್ಲ ಎಂದು ಅಜ್ಜಿ ನೀತಿ ಪಾಠ ಹೇಳಿದ್ದಾರೆ.