ಕತ್ತಿನ ಚೈನಿನಲ್ಲಿ ಸೇಫ್ಟಿಪಿನ್ ಹಾಕಿಕೊಳ್ಳುವವರೇ ಎಚ್ಚರ

ಮುಂಬೈ: ಬೇಗನೆ ಸಿಗಬೇಕು ಅಂತ ಕೆಲವರು ತಮ್ಮ ಕತ್ತಿನಲ್ಲಿರುವ ತಮ್ಮ ಚೈನಿಗೆ ಸೇಫ್ಟಿ ಪಿನ್ ಹಾಕಿಕೊಂಡಿರುತ್ತಾರೆ. ಇದೊಂದು ಒಳ್ಳೆಯ ಉಪಾಯವಾದ್ರೂ ಇದರಿಂದ ಅಪಾಯ ತಪ್ಪಿದ್ದಲ್ಲ. ಇದಕ್ಕೆ ನಿದರ್ಶನ ಮುಂಬೈನಲ್ಲಿ ನಡೆದ ಘಟನೆ.

ಹೌದು. ಮಹಿಳೆಯೊಬ್ಬರು ತಮ್ಮ ಮಾಂಗಲ್ಯ ಸರದಲ್ಲಿ ಪಿನ್ ಸಿಕ್ಕಿಸಿಕೊಂಡಿದ್ದರು. ಈ ಪಿನ್ ಮಗುವಿನ ಜೀವಕ್ಕೆ ಅಪಾಯವುಂಟು ಮಾಡಿದೆ. ಈ ಘಟನೆ ಕಳೆದ ವಾರ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ.

ಪುಟ್ಟ ಮಕ್ಕಳನ್ನು ಎತ್ತಿಕೊಂಡಾಗ ಅವರು ಕತ್ತಿನಲ್ಲಿರುವ ಚೈನ್ ಅನ್ನು ಬಾಯಿಗೆ ಹಾಕಿಕೊಳ್ಳುವುದು ಸಾಮಾನ್ಯ. ಅಂತೆಯೇ ಇಲ್ಲಿ ಕೂಡ ಮಗುವನ್ನು ತಾಯಿ ಎತ್ತಿಕೊಂಡಾಗ, ಮಗು ತನ್ನ ತಾಯಿ ಕತ್ತಿನಲ್ಲಿದ್ದ ಕರಿಮಣಿಯಲ್ಲಿ ಸಿಕ್ಕಿಸಿರುವ ಪಿನ್ ಅನ್ನು ನುಂಗಿದೆ. ಈ ಪಿನ್ ಮಗುವಿನ ಗಂಟಲಲ್ಲಿ ಸಿಕ್ಕಿಹಾಕಿಕೊಂಡಿದೆ.

ಮಗು ನಿರಂತವಾಗಿ ಅಳುತ್ತಿರೋದನ್ನು ಗಮನಿಸಿದ ಹೆತ್ತವರು ಗಾಬರಿಯಾಗಿದ್ದಾರೆ. ಅಲ್ಲದೇ ಮಗು ನೀರು ಕುಡಿಯಲು ಕೂಡ ನಿರಾಕರಿಸುತ್ತಿತ್ತು. ಹೀಗಾಗಿ ಹೆತ್ತವರು ಮಗುವನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ, ಈ ವೇಳೆ ಪರೀಕ್ಷಿಸಿದ ವೈದ್ಯರು ಮಗುವಿನ ಎಕ್ಸ್ ರೇ ತೆಗೆದಾಗ ಮಗುವಿನ ಕುತ್ತಿಗೆಯಲ್ಲಿ ಪಿನ್ ಸಿಲುಕಿರುವ ಬಗ್ಗೆ ತಿಳಿದುಬಂದಿದೆ. ಅಲ್ಲಿಂದ ಕೂಡಲೇ ನಗರದ ಕೆಇಎಂ ಆಸ್ಪತ್ರೆಗೆ ತೆರಳಿರುವುದಾಗಿ ಮಗುವಿನ ತಂದೆ ತಿಳಿಸಿದ್ದಾರೆ.

ಶಸ್ತ್ರ ಚಿಕಿತ್ಸೆಯ ಮೂಲಕ ಮಗುವಿನ ಗಂಟಲಲ್ಲಿ ಸಿಲುಕಿದ್ದ ಪಿನ್ ಹೊರತೆಗೆಯಲಾಗಿದೆ. ಆದ್ರೆ ಇದನ್ನು ತೆಗಯಲು ತುಂಬಾ ಕಷ್ಟವಾಯಿತು. ಯಾಕಂದ್ರೆ ಇದರಿಂದ ಮಗುವಿನ ಜೀವಕ್ಕೇ ಕುತ್ತು ತರುವಂತಿತ್ತು ಅಂತ ಆಸ್ಪತ್ರೆಯ ವೈದ್ಯರಾದ ಡಾ. ನೀಲಂ ಸತೆ ತಿಳಿಸಿದ್ದಾರೆ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv