ಮಹಿಳೆಯರಿಗೆ ಮನೆ ಬಾಡಿಗೆ ನೀಡಿ ರೂಮಲ್ಲಿ ಹಿಡನ್ ಕ್ಯಾಮೆರಾ ಇಟ್ಟಿದ್ದ ಮಾಲೀಕ ಅರೆಸ್ಟ್

ಚೆನ್ನೈ: ಮಹಿಳೆಯರಿಗೆ ಬಾಡಿಗೆ ನೀಡಿದ್ದ ಮನೆಯ ಕೋಣೆಗಳಲ್ಲಿ ಹಿಡನ್ ಕ್ಯಾಮೆರಾ ಅಳವಡಿಸಿದ್ದ ಮಾಲೀಕನನ್ನು ತಮಿಳುನಾಡು ಪೊಲೀಸರು ಬಂಧಿಸಿದ್ದಾರೆ.

ಕೇರಳ ಮೂಲದ ಸಂಪತ್ ಕುಮಾರ್ ಅಲಿಯಾಸ್ ಸಂಜಯ್ ಬಂಧಿತ ಮಾಲೀಕ. ಸಂಜಯ್ ಚೆನ್ನೈನ ಆಡಂಬಾಕಂನಲ್ಲಿ ಅಪಾರ್ಟ್ ಮೆಂಟ್‍ ಒಂದನ್ನು ಹೊಂದಿದ್ದು, ಮಹಿಳೆಯರಿಗೆ ಬಾಡಿಗೆ ನೀಡಿದ್ದ ಮನೆಯಲ್ಲಿ ಹಿಡನ್ ಕ್ಯಾಮೆರಾ ಅಳವಡಿಸಿ ಸಿಕ್ಕಿಬಿದ್ದಿದ್ದಾನೆ.

ಆಗಿದ್ದೇನು?:
ಏಳು ಜನ ಉದ್ಯೋಗಸ್ಥ ಮಹಿಳೆಯರು ಸಂಜಯ್ ಅಪಾರ್ಟ್ ಮೆಂಟ್‍ನಲ್ಲಿ ಮನೆಯೊಂದನ್ನು ಸೆಪ್ಟೆಂಬರ್ ನಲ್ಲಿ ಬಾಡಿಗೆ ಪಡೆದಿದ್ದರು. ಮನೆಯಲ್ಲಿ ವಾಸವಿದ್ದವರಲ್ಲಿ ಓರ್ವ ಮಹಿಳೆ ತನ್ನ ಹೇರ್ ಡ್ರೈಯರ್ ದುರಸ್ತಿಯಾಗಿದ್ದರಿಂದ ಪವರ್ ಪ್ಲಗ್‍ನ ಸಾಕೇಟ್ ತೆರೆದಿದ್ದಾಳೆ. ಈ ವೇಳೆ ಅದರಲ್ಲಿ ಸಣ್ಣ ಕ್ಯಾಮೆರಾ ಇರುವುದು ತಿಳಿದುಬಂದಿದೆ. ಮಾಲೀಕನ ಮೇಲೆ ಅನುಮಾನ ವ್ಯಕ್ತಪಡಿಸಿದ ಮಹಿಳೆಯರು ಕೂಡಲೇ ಸಮೀಪದ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.

ಪ್ರಕರಣ ದಾಖಲಿಸಿಕೊಂಡು, ಮಹಿಳೆಯರು ವಾಸವಿದ್ದ ಮನೆಯನ್ನು ಪೊಲೀಸರು ಪರಿಶೀಲನೆ ನಡೆಸಿದ್ದಾರೆ. ಈ ವೇಳೆ ಬೆಡ್ ರೂಮ್, ಬೆಡ್ ಲ್ಯಾಂಪ್ಸ್ ಹಾಗೂ ಸ್ನಾನದ ಕೊಣೆಯಲ್ಲಿ ಬಟ್ಟೆ ಹಾಕುವ ರಾಡ್ ಸೇರಿದಂತೆ ಹಲವು ಕಡೆಗಳಲ್ಲಿ ಹಿಡನ್ ಕ್ಯಾಮೆರಾಗಳು ಪತ್ತೆಯಾಗಿವೆ. ತಕ್ಷಣವೇ ಅಪಾರ್ಟ್ ಮೆಂಟ್ ಮಾಲೀಕ ಸಂಜಯ್‍ನನ್ನು ಬಂಧಿಸಿ ವಿಚಾರಣೆ ನಡೆಸುತ್ತಿದ್ದಾರೆ ಎಂದು ವರದಿಯಾಗಿದೆ.

ಮಹಿಳೆಯರು ಕೆಲಸಕ್ಕೆ ಹೋದಾಗ ದುರಸ್ತಿ ಕೆಲಸ ನೆಪ ಹೇಳಿ ಸಂಜಯ್ ಮನೆಯೊಳಗೆ ಹೋಗುತ್ತಿದ್ದ ಎಂದು ಮಹಿಳೆಯರು ದೂರಿನಲ್ಲಿ ತಿಳಿಸಿದ್ದಾರೆ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್‍ಲೋಡ್ ಮಾಡಿ: play.google.com/publictv