ಲೇಡಿ ರೌಡಿಶೀಟರ್ ಮೀಟರ್ ಬಡ್ಡಿ ದಂಧೆಗೆ ವಿಡಿಯೋ ಮಾಡ್ಕೊಂಡು ಗೃಹಿಣಿ ಆತ್ಮಹತ್ಯೆ

ಬೆಂಗಳೂರು: ಮೀಟರ್ ಬಡ್ಡಿ ದಂಧೆಯ ಹಿಂಸೆಗೆ ಗೃಹಿಣಿಯೊಬ್ಬಳು, ವಿಡಿಯೋ ಮಾಡಿ ಆತ್ಮಹತ್ಯೆ ಮಾಡಿಕೊಂಡ ಘಟನೆ ಬೆಂಗಳೂರಿನ ಉತ್ತರಹಳ್ಳಿಯಲ್ಲಿ ನಡೆದಿದೆ.

ಉತ್ತರಹಳ್ಳಿಯ ಪೂರ್ಣಪ್ರಜ್ಞ ಲೇಔಟ್ ನಿವಾಸಿ ಉಮಾ.ಎಸ್ ಆತ್ಮಹತ್ಯೆ ಮಾಡಿಕೊಂಡ ಮಹಿಳೆ. ಆತ್ಮಹತ್ಯೆಗೂ ಮುನ್ನ ಉಮಾ ತನ್ನ ಮೊಬೈಲ್‍ನಲ್ಲಿ ತನಗೆ ಆಗಿರುವ ಅನ್ಯಾಯದ ಕುರಿತು ಹೇಳಿದ್ದಾಳೆ.

ಮೃತ ಉಮಾ ಸಿ.ಕೆ.ಅಚ್ಚುಕಟ್ಟು ಪೊಲೀಸ್ ಠಾಣೆಯ ಲೇಡಿ ರೌಡಿಶೀಟರ್ ಯಶಸ್ವಿನಿ ಬಳಿ ಶೇ.25 ರಷ್ಟು ಬಡ್ಡಿ ದರದಂತೆ 1.5 ಲಕ್ಷ ರೂ. ಪಡೆದಿದ್ದಳು. ಕಳೆದ ಎರಡು ವರ್ಷಗಳಿಂದಲೂ ಉಮಾ ಪಡೆದ ಹಣಕ್ಕೆ ಬಡ್ಡಿ ಕಟ್ಟುತ್ತಾ ಬಂದಿದ್ದಳಂತೆ. ಆದರೆ ಈ ತಿಂಗಳು ಬಡ್ಡಿ ಕಟ್ಟುವಲ್ಲಿ ಉಮಾ ವಿಳಂಬ ಮಾಡಿದ್ದರಿಂದ ಯಶಸ್ವಿನಿ ವಿಪರೀತ ತೊಂದರೆ ಕೊಡಲು ಪ್ರಾರಂಭಿಸಿದ್ದಳು. ಇದರಿಂದ ಮನನೊಂದ ಉಮಾ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ.

ಈ ಕುರಿತು ಸುಬ್ರಹ್ಮಣ್ಯಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಈ ಹಿಂದೆಯೂ ಬಡ್ಡಿ ನೀಡುವಲ್ಲಿ ವಿಳಂಬ ಮಾಡಿದವರಿಗೆ ರೌಡಿಶೀಟರ್ ಯಶಸ್ವಿನಿ ತೊಂದರೆ ಕೊಟ್ಟಿದ್ದ ವಿಚಾರ ಈಗ ಬೆಳಕಿಗೆ ಬಂದಿದೆ.