ಪ್ರೇಮ ವಿವಾಹ, ತಂಗಿಯ ಪತಿಯನ್ನೇ ಕೊಂದ ಪಾಪಿ- ಆಘಾತದಿಂದ ಮಹಿಳೆಯೂ ಆತ್ಮಹತ್ಯೆ

ಭೋಪಾಲ್: ಪ್ರೇಮ ವಿವಾಹವಾಗಿದ್ದಕ್ಕೆ ಸಹೋದರಿಯ ಪತಿಯ ರುಂಡವನ್ನು ಕೊಡಲಿಯಿಂದ ಕೊಚ್ಚಿ ಕೊಲೆ ಮಾಡಿದ್ದು, ಸುದ್ದಿ ತಿಳಿದ ಪತ್ನಿ ಸಹ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಆಘಾತಕಾರಿ ಘಟನೆ ನಡೆದಿದೆ.

ಮಧ್ಯಪ್ರದೇಶದ ಜಬಲ್‍ಪುರದಲ್ಲಿ ಘಟನೆ ನಡೆದಿದ್ದು, ವಿವಾಹಕ್ಕೆ ನಾವು ಒಪ್ಪಿದ್ದೇವೆ ಮನೆಗೆ ಬಾ ಎಂದು ತನ್ನ ಸಹೋದರಿಯನ್ನು ಕುಟುಂಬಸ್ಥರು ಕರೆಸಿಕೊಂಡಿದ್ದಾರೆ. ಬಳಿಕ ವಿವಾಹಕ್ಕೆ ವಿರೋಧ ವ್ಯಕ್ತಪಡಿಸಿ, ಅಳಿಯನ ರುಂಡವನ್ನೇ ಕೊಡಲಿಯಿಂದ ಕತ್ತರಿಸಿ ಕೊಲೆ ಮಾಡಲಾಗಿದ್ದು, ಘಟನೆಯಿಂದ ಬೇಸತ್ತ ಮಹಿಳೆ ಸಹ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ. ವ್ಯಕ್ತಿ ಅಳಿಯನ ರುಂಡವನ್ನು ಪೊಲೀಸ್ ಠಾಣೆಗೇ ಕೊಂಡೊಯ್ದಿದ್ದು, ಬರುವಷ್ಟರಲ್ಲಿ ಸಹೋದರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ.

ಆರೋಪಿ ಕೊಡಲಿಯಿಂದ ತನ್ನ ಅಳಿಯನ ಕತ್ತು ಸೀಳಿದ್ದು, ಈ ಸುದ್ದಿ ತಿಳಿಯುತ್ತಿದ್ದಂತೆ ಪೋಷಕರ ಮನೆಯಲ್ಲೇ ಮಹಿಳೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ. ಪ್ರಕರಣದ ಕುರಿತು ಪೊಲೀಸರು ಗಂಭೀರವಾಗಿ ತನಿಖೆ ಕೈಗೊಂಡಿದ್ದು, ಮಹಿಳೆಯದು ಕೊಲೆಯೋ ಅಥವಾ ಆತ್ಮಹತ್ಯೆಯೋ ಎಂಬ ಬಗ್ಗೆ ಮಾಹಿತಿ ಕಲೆ ಹಾಕುತ್ತಿದ್ದಾರೆ. ವ್ಯಕ್ತಿಯ ಕೊಲೆ ಬಗ್ಗೆ ಮಾಹಿತಿ ತಿಳಿಯುತ್ತಿದ್ದಂತೆ ಆರೋಪಿಯನ್ನು ಬಂಧಿಸಿದ್ದಾರೆ.

ಪ್ರೇಮಿಗಳಿಬ್ಬರೂ ಎರಡು ತಿಂಗಳ ಹಿಂದೆ ವಿವಾಹವಾಗಿದ್ದಾರೆ. ಬಳಿಕ ಇಬ್ಬರೂ ಮನೆ ಬಿಟ್ಟು ಬೇರೆಡೆ ವಾಸವಾಗಿದ್ದಾರೆ. ಇಬ್ಬರೂ ಮನೆಯಿಂದ ಬೇರೆಯಾಗುತ್ತಿದ್ದಂತೆ ಕುಟುಂಬಸ್ಥರು ಪೊಲೀಸರಿಗೆ ದೂರು ನೀಡಿದ್ದಾರೆ. ಫೆಬ್ರವರಿ 26ರಂದು ಮಹಿಳೆ ಹಾಗೂ ಆಕೆಯ ಪತಿ ಪೊಲೀಸ್ ಠಾಣೆಗೆ ಆಗಮಿಸಿ ತಾವಿಬ್ಬರೂ ವಿವಾಹವಾಗಿರುವ ಬಗ್ಗೆ ತಿಳಿಸಿದ್ದಾರೆ.

ಈ ಘಟನೆ ನಡೆದ ಬಳಿಕ ಸಂತ್ರಸ್ತನ ಕುಟುಂಬಸ್ಥರು ವಿವಾಹವನ್ನು ಒಪ್ಪಿಕೊಂಡಿದ್ದು, ಸಂತ್ರಸ್ತನ ಕುಟುಂಬದ ಜೊತೆ ಹಳೆ ದ್ವೇಷ ಇದ್ದಿದ್ದರಿಂದ ಮಹಿಳೆಯ ಮನೆಯವರು ಒಪ್ಪಿರಲಿಲ್ಲ ಎಂಬ ಮಾಹಿತಿ ತನಿಖೆ ವೇಳೆ ಬಹಿರಂಗವಾಗಿದೆ.