ಓವನ್ ಇಲ್ಲದೇ ಮಾಡಿ ರುಚಿ ರುಚಿಯಾದ ಕ್ರಿಸ್‍ಮಸ್ ಕೇಕ್

ಹೊಸ ಕೊರೊನಾ ಅಲೆ ಹಿನ್ನೆಲೆ ಇಡೀ ಜಗತ್ತು ತಲ್ಲಣಗೊಂಡಿದೆ. ಸರ್ಕಾರ ಸಹ ಕಠಿಣ ನಿಯಮಗಳನ್ನ ಜಾರಿಗೆ ತಂದಿದೆ. ಕ್ರಿಸ್‍ಮಸ್ ಹಬ್ಬವನ್ನ ಕುಟುಂಬಸ್ಥರ ಜೊತೆ ಮನೆಯಲ್ಲಿಯೇ ಅಚರಿಸುವಂತೆ ಸರ್ಕಾರ ಮನವಿ ಸಹ ಮಾಡಿಕೊಂಡಿದೆ. ಕೊರೊನಾದಿಂದಾಗಿ ಹಬ್ಬದ ದಿನ ಹೆಚ್ಚಿನ ಸಮಯ ಮನೆಯಲ್ಲಿರಬೇಕಾಗುತ್ತೆ. ಹಾಗಾಗಿ ಹೊರಗಿನಿಂದ ಕೇಕ್ ತರದೇ ಮನೆಯಲ್ಲಿಯೇ ತಯಾರಿಸಿ ಆರೋಗ್ಯಕರ ಕ್ರಿಸ್‍ಮಸ್ ಆಚರಿಸಿ. ಓವನ್ ಇಲ್ಲದೇ ಸರಳವಾಗಿ ಕೇಕ್ ಮಾಡುವ ವಿಧಾನ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು
* ಮೊಟ್ಟೆ-4
* ಸಕ್ಕರೆ ಪುಡಿ – 1 ಕಪ್
* ಮೈದಾ- 1 ಕಪ್
* ಬೇಕಿಂಗ್ ಸೋಡಾ- 1 ಟೀ ಸ್ಪೂನ್
* ಉಪ್ಪು- 1/4 ಟೀ ಸ್ಪೂನ್
* ತುಪ್ಪ – 1 ಕಪ್
* ವೆನ್ನಿಲ್ಲಾ ಎಸೆನ್ಸ್ – 1/2 ಟೀ ಸ್ಪೂನ್

ಮಾಡುವ ವಿಧಾನ
* ಮೊದಲಿಗೆ ಮಿಕ್ಸಿಂಗ್ ಬೌಲ್‍ಗೆ ನಾಲ್ಕು ಮೊಟ್ಟೆಗಳನ್ನ ಹಾಕಿಕೊಂಡು ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಬೇಕು.
* ಮೊಟ್ಟೆ ಮಿಶ್ರಣಕ್ಕೆ ಒಂದು ಕಪ್ ನಷ್ಟು ಸಕ್ಕರೆ ಪುಡಿ ಹಾಕಿ ಗಂಟು ಬರದಂತೆ ಕಲಸಿಕೊಳ್ಳಿ.
* ಮೊಟ್ಟೆ ಮತ್ತು ಸಕ್ಕರೆ ಪುಡಿ ಚೆನ್ನಾಗಿ ಮಿಶ್ರಣವಾದ ಮೇಲೆ ಮೈದಾ ಹಿಟ್ಟು, ಬೇಕಿಂಗ್ ಸೋಡಾ, ಉಪ್ಪು, ತುಪ್ಪ ಮತ್ತು ವೆನ್ನಿಲ್ಲಾ ಎಸೆನ್ಸ್ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಬೇಕು. (ನೀವು ಡ್ರೈ ಫ್ರೂಟ್ಸ್ ಪ್ರಿಯರಾಗಿದ್ರೆ, ಈ ವೇಳೆ ಸಣ್ಣದಾಗಿ ಕತ್ತರಿಸಿರುವ ಒಣ ದ್ರಾಕ್ಷಿ, ಗೋಡಂಬಿ, ಪಿಸ್ತಾ ಇನ್ನಿತರ ಡ್ರೈ ಫ್ರೂಟ್ಸ್ ಸೇರಿಸಿಕೊಳ್ಳಬಹುದು).

* ಒಂದು ಬೌಲ್‍ಗೆ ತುಪ್ಪ ಸವರಿ, ಅದರ ಮೇಲೆ ಒಣ ಮೈದಾ ಹಿಟ್ಟು ಹಾಕಿ ತೆಳುಬಾಗಿ ಹರಡಿ, ಸಿದ್ಧವಾಗಿರೋ ಮಿಶ್ರಣವನ್ನ ಹಾಕಿ ಗಂಟು ಬರದಂತೆ ಸಮ ಮಾಡಿಕೊಳ್ಳಿ.
* ಒಂದು ದೊಡ್ಡ ಪ್ಯಾನ್‍ಗೆ ಎರಡು ಟೀ ಸ್ಪೂನ್ ಎಣ್ಣೆ ಹಾಕಿ ಬಿಸಿ ಮಾಡಿಕೊಳ್ಳಿ. ಈ ಪ್ಯಾನ್ ನಲ್ಲಿ ಚಿಕ್ಕ ಸ್ಟ್ಯಾಂಡ್ ಇರಿಸಬೇಕು. ಈ ಸ್ಟ್ಯಾಂಡ್ ಮೇಲೆ ನಿಧಾನವಾಗಿ ಮಿಶ್ರಣ ಹಾಕಿರೋ ಬೌಲ್ ಇರಿಸಿ ಮುಚ್ಚಳ ಮುಚ್ಚಿ 40 ರಿಂದ 45 ನಿಮಿಷ ಕಡಿಮೆ ಉರಿಯಲ್ಲಿ ಬೇಯಿಸಿದ್ರೆ ಕ್ರಿಸ್‍ಮಸ್ ಕೇಕ್ ಸಿದ್ಧ.