ಕೊರೊನಾದಿಂದ ಗುಣಮುಖರಾದ 38 ಪುರುಷರ ಪೈಕಿ 6 ಜನರ ವೀರ್ಯದಲ್ಲಿ ಸೋಂಕು

ಬೀಜಿಂಗ್: ಕೋವಿಡ್-19 ದಿಂದ ಗುಣಮುಖರಾದ 38 ಪುರುಷರ ಪೈಕಿ 6 ಜನರ ವೀರ್ಯದಲ್ಲಿ ಕೊರೊನಾ ಸೋಂಕು ಇರುತ್ತೆ ಎಂಬ ವಿಷಯವನ್ನು ಚೀನಾದ ಅಧ್ಯಯನವೊಂದು ಬಹಿರಂಗಗೊಳಿಸಿದೆ.

ಲೈಂಗಿಕ ಸಂಪರ್ಕದಿಂದ ಕೊರೊನಾ ಸೋಂಕು ಹರಡುತ್ತಾ ಅನ್ನೋ ಪ್ರಶ್ನೆಗೆ ಚೀನಾ ವಿಜ್ಞಾನಿಗಳು ಉತ್ತರ ನೀಡಿದ್ದಾರೆ. ಕೊರೊನಾದಿಂದ ಗುಣಮುಖರಾದವರಿಗೆ ಮತ್ತೆ ಸೋಂಕು ಕಾಣಿಸಿಕೊಳ್ಳುವ ಸಾಧ್ಯತೆಯನ್ನು ಅಲ್ಲಗಳೆಯುವಂತಿಲ್ಲ. ಈ ಕುರಿತು ಅಧ್ಯಯನ ನಡೆಸಿದ ಚೀನಾ ವಿಜ್ಞಾನಿಗಳ ತಂಡ ಮಹತ್ವದ ವಿಷಯಗಳನ್ನು ಹಂಚಿಕೊಂಡಿದೆ.

ಜೆಎಎಂಎ ನೆಟ್‍ವರ್ಕ್ ಓಪನ್ ಅಧ್ಯಯನ ತಂಡದ ಪ್ರಕಾರ, ಗುಣಮುಖರಾದ ಶೇ.16ರಷ್ಟು ಪುರುಷರ ವೀರ್ಯದಲ್ಲಿ ಕೊರೊನಾ ಸೋಂಕು ಇರುತ್ತದೆ. ಅಂದರೆ ಗುಣಮುಖರಾದ 38 ಪುರುಷರಲ್ಲಿ 6 ಜನರಿಗೆ ಈ ಲಕ್ಷಣಗಳು ಕಂಡು ಬರಲಿವೆ ಎಂದು ತಿಳಿಸಿದೆ. ಇನ್ನು ಅಧ್ಯಯನ ತಂಡ 15 ರಿಂದ 59 ವರ್ಷದೊಳಗಿನವರನ್ನು ಗಣನೆಗೆ ತೆಗೆದುಕೊಂಡಿತ್ತು.

ಅಧ್ಯಯನ ತಂಡ ಲೈಂಗಿಕ ಕ್ರಿಯೆ ನಡೆಸುವ ಮೂಲಕ ಸೋಂಕು ಹರಡುತ್ತೆ ಎಂಬುದನ್ನು ಸ್ಪಷ್ಟಪಡಿಸಿಲ್ಲ. ವೀರ್ಯದಲ್ಲಿ ಸೋಂಕಿರುತ್ತೆ ಎಂಬುದನ್ನ ಮಾತ್ರ ಹೇಳಿದೆ ಎಂದು ಕೊರೊನಾ ತಜ್ಞರು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.