ಆಟವಾಡೋಕೆ ತೊಂದರೆ ಕೊಟ್ಟ 5ರ ಬಾಲಕಿಯನ್ನು ಇಟ್ಟಿಗೆಯಿಂದ ಹೊಡೆದು ಕೊಂದ ಬಾಲಕ

– ಲೈಂಗಿಕ ದೌರ್ಜನ್ಯ ಎಸೆಗಿರುವ ಶಂಕೆ
– ಕಸದ ರಾಶಿಯಲ್ಲಿ ಬಾಲಕಿ ಮೃತದೇಹ ಪತ್ತೆ

ನವದೆಹಲಿ: ಆಟವಾಡೋಕೆ ತೊಂದರೆ ಕೊಡುತ್ತಾಳೆಂದು 5 ವರ್ಷದ ಬಾಲಕಿಯನ್ನು ಬಾಲಕನೋರ್ವ ಇಟ್ಟಿಗೆಯಿಂದ ಹೊಡೆದು ಕೊಂದ ಅಮಾನವೀಯ ಘಟನೆ ದೆಹಲಿಯ ನಿಹಾಲ್ ವಿಹಾರ್ ಪ್ರದೇಶದಲ್ಲಿ ನಡೆದಿದೆ.

ಶುಕ್ರವಾರದಿಂದ ಬಾಲಕಿ ನಾಪತ್ತೆ ಆಗಿದ್ದಳು. ಈ ಬಗ್ಗೆ ಬಾಲಕಿ ತಂದೆ ಪೊಲೀಸರಿಗೆ ದೂರು ನೀಡಿದ್ದರು. ಆದರೆ ಎಷ್ಟೇ ಹುಡುಕಾಟ ನಡೆಸಿದರೂ ಬಾಲಕಿ ಮಾತ್ರ ಪತ್ತೆಯಾಗಿರಲಿಲ್ಲ. ಆದರೆ ಮರುದಿನ ಬೆಳಗ್ಗೆ ನಿಹಾಲ್ ವಿಹಾರಿನ ಕಸದ ರಾಶಿಯಲ್ಲಿ ಬಳಿ ಬಾಲಕಿ ಮೃತದೇಹ ಪತ್ತೆಯಾಗಿತ್ತು. ಲೈಂಗಿಕ ದೌರ್ಜನ್ಯ ನಡೆಸಿ, ಬಳಿಕ ಇಟ್ಟಿಗೆಯಿಂದ ಹೊಡೆದು ಬಾಲಕಿಯನ್ನು ಕೊಲೆ ಮಾಡಲಾಗಿದೆ ಎಂದು ಪೊಲೀಸರು ಶಂಕೆ ವ್ಯಕ್ತಪಡಿಸಿದ್ದಾರೆ.

ಮೃತದೇಹದ ಪಕ್ಕ ರಕ್ತಸಿಕ್ತ ಇಟ್ಟಿಗೆ ಪತ್ತೆಯಾಗಿತ್ತು. ಈ ಬಗ್ಗೆ ತನಿಖೆ ಕೈಗೊಂಡಾಗ ಆರೋಪಿ ಬಗ್ಗೆ ಸುಳಿವು ಸಿಕ್ಕಿತು. ತನಿಖೆ ಚುರುಕುಗೊಳಿಸಿದಾಗ ಆರೋಪಿ ಯಾರೆಂದು ತಿಳಿದಿದೆ. ಬಾಲಕನೋರ್ವ ತಾನೇ ಬಾಲಕಿಯ ಕೊಲೆ ಮಾಡಿರುವುದಾಗ ಒಪ್ಪಿಕೊಂಡಿದ್ದಾನೆ.

ನನಗೆ ಬಾಲಕಿ ಆಟವಾಡಲು ಬಿಡುತ್ತಿರಲ್ಲ ಅದಕ್ಕೆ ಕೊಲೆ ಮಾಡಿದೆ ಎಂದು ಬಾಲಕ ಬಾಯಿಬಿಟ್ಟಿದ್ದಾನೆ. ಈ ಹಿಂದೆ ಕೂಡ ಸಾಕಷ್ಟು ಬಾರಿ ಬಾಲಕ ಬಾಲಕಿಗೆ ಹೊಡೆದಿದ್ದನು. ಆಟವಾಡಲು ಬಿಡಲ್ಲ ತೊಂದರೆ ಕೊಡುತ್ತಾಳೆ ಎಂದು ಬಾಲಕ ಬಾಲಕಿಗೆ ಹೊಡೆದಿದ್ದನು.

1 ವರ್ಷದ ಹಿಂದೆ ಬಾಲಕಿಯ ತಾಯಿ ಮೃತಪಟ್ಟಿದ್ದರು. ಬಳಿಕ ಮಗಳನ್ನು ತಂದೆಯೊಬ್ಬರೇ ನೋಡಿಕೊಳ್ಳುತ್ತಿದ್ದರು. ವೃತ್ತಿಯಲ್ಲಿ ಚಾಲಕರಾಗಿದ್ದ ಬಾಲಕಿ ತಂದೆ ಅಕ್ಕ ಪಕ್ಕದ ಮನೆಯವರ ಬಳಿ ಮಗಳನ್ನು ಸ್ವಲ್ಪ ನೋಡಿಕೊಳ್ಳಿ ಎಂದು ಹೇಳಿ ಕೆಲಸಕ್ಕೆ ಹೋಗುತ್ತಿದ್ದರು. ಎಂದಿನಂತೆ ಶುಕ್ರವಾರ ಬೆಳಗ್ಗೆ ಕೆಲಸಕ್ಕೆ ಹೋದ ತಂದೆ ಸಂಜೆ ವೇಳೆಗೆ ಮನೆಗೆ ಬಂದಾಗ ಮಗಳು ಕಾಣಲಿಲ್ಲ. ಬಳಿಕ ಅಕ್ಕಪಕ್ಕದ ಮನೆಯವನ್ನು ವಿಚಾರಿಸಿದಾಗ ಆಕೆ ಕಾಣೆಯಾಗಿರುವುದು ಪತ್ತೆಯಾಗಿದ್ದು, ಮಗಳಿಗಾಗಿ ಹುಡುಕಾಟ ನಡೆಸಿದ್ದರು. ಆದರೆ ಕೊನೆಗೆ ತಂದೆಗೆ ಸಿಕ್ಕಿದ್ದು ಮಾತ್ರ ಮಗಳ ಹೆಣ.