ಮಕ್ಕಳ ಕೊರತೆಯಿಂದಾಗಿ ಮುಚ್ಚುವ ಸ್ಥಿತಿಯಲ್ಲಿವೆ ಕನ್ನಡ ಶಾಲೆಗಳು

ಬೆಂಗಳೂರು: ಮಕ್ಕಳ ಕೊರತೆಯಿಂದಾಗಿ 603 ಕನ್ನಡ ಶಾಲೆಗಳ ಮೇಲೆ ತೂಗುಗತ್ತಿ ನೇತಾಡುತ್ತಿದ್ದು, ಮತ್ತೆ ಶಾಲೆಗಳು ಆರಂಭಗೊಳ್ಳೋದು ಸಂಶಯ ಎನ್ನಲಾಗಿದೆ.

1 ಸಾವಿರ ಸರ್ಕಾರಿ ಶಾಲೆಗಳಲ್ಲಿ ಇಂಗ್ಲಿಷ್ ಮಾಧ್ಯಮ ಆರಂಭಿಸಿದ್ದರಿಂದ ಮಕ್ಕಳ ಸಂಖ್ಯೆ ಹೆಚ್ಚಿದೆ ಎನ್ನುತ್ತಿರುವಾಗಲೇ ಮಕ್ಕಳ ಕೊರತೆಯಿಂದ ಕೃಷವಾಗಿರುವ ಶಾಲೆಗಳ ವಾಸ್ತವ ಚಿತ್ರಣವೂ ಲಭಿಸಿದೆ. ಕನ್ನಡ ಶಾಲೆಗಳು ದಿನ ಕಳೆದಂತೆ ಕಳೆಗುಂದುತ್ತಿವೆ. 2018-19ನೇ ಸಾಲಿನಲ್ಲಿ 433 ಸರ್ಕಾರಿ ಕಿರಿಯ ಪ್ರಾಥಮಿಕ ಮತ್ತು 71 ಹಿರಿಯ ಪ್ರಾಥಮಿಕ ಶಾಲೆಗಳಲ್ಲಿ ಒಬ್ಬ ವಿದ್ಯಾರ್ಥಿಯೂ ದಾಖಲಾಗಿಲ್ಲ.

ಇದೇ ಅವಧಿಯಲ್ಲಿ 20 ಅನುದಾನಿತ ಕಿರಿಯ ಪ್ರಾಥಮಿಕ ಶಾಲೆಗಳಲ್ಲಿ ಹಾಗೂ 79 ಹಿರಿಯ ಪ್ರಾಥಮಿಕ ಶಾಲೆಗಳಿಗೂ ಹೊಸದಾಗಿ ಮಕ್ಕಳು ಬಂದೇ ಇಲ್ಲ. ಎರಡೂ ವಿಭಾಗಗಳನ್ನು ಸೇರಿಸಿದ್ರೆ ಒಟ್ಟು 603 ಶಾಲೆಗಳಲ್ಲಿ ಮಕ್ಕಳ ಪ್ರವೇಶಾತಿ ಆಗಿಲ್ಲ. 2019-20ನೇ ಸಾಲಿನ ಪ್ರವೇಶಾತಿ ಮಾಹಿತಿಯನ್ನು ಸಂಗ್ರಹಿಸುವ ಕೆಲಸದಲ್ಲಿ ಪ್ರಾಥಮಿಕ ಮತ್ತು ಪ್ರೌಢಶಿಕ್ಷಣ ಇಲಾಖೆ ತಲ್ಲೀನವಾಗಿದ್ದು ಇನ್ನೊಂದು ವಾರದಲ್ಲಿ ಮಾಹಿತಿ ಸಂಗ್ರಹ ಕಾರ್ಯ ಪೂರ್ಣಗೊಳ್ಳುವ ನಿರೀಕ್ಷೆ ಇದೆ.