ಹಣಕ್ಕಾಗಿ ಪತ್ನಿಗೆ ಕಿರುಕುಳ- ಮಾತು ಕೇಳದಿದ್ರೆ ಮಕ್ಳನ್ನೇ ರೇಪ್ ಮಾಡುವುದಾಗಿ ಸಹೋದರರಿಂದ ಬೆದರಿಕೆ

ರಾಮನಗರ: ವಿಚ್ಚೇದನವಾದ್ರೂ ಪತಿಯೊಬ್ಬ ತನ್ನ ಮೊದಲ ಪತ್ನಿಯನ್ನು ಹಣಕ್ಕಾಗಿ ಕಿರುಕುಳ ನೀಡುವುದಲ್ಲದೆ ಒಟ್ಟಾಗಿ ಬಾಳದಿದ್ದರೆ ಜೀವ ಉಳಿಸಲ್ಲ ಎಂದು ಬೆದರಿಕೆ ಹಾಕುತ್ತಿರುವ ಘಟನೆ ರಾಮನಗರದಲ್ಲಿ ನಡೆದಿದೆ.

ಗೀತಾ ಸಿಂಗ್ ಪತಿಯ ಕಿರುಕುಳಕ್ಕೆ ಬೇಸತ್ತ ಮಹಿಳೆ. ರಾಯಚೂರಿನ ಎಲ್‍ಬಿಎಸ್ ನಿವಾಸಿಯಾಗಿರುವ ಗೀತಾ ಅವರಿಗೆ ಐದು ಜನ ಮಕ್ಕಳು. ಸಫಾಯಿ ಕರ್ಮಚಾರಿ ಕೆಲಸ ಮಾಡಿಕೊಂಡು ಬದುಕುತ್ತಿರುವ ಗೀತಾ ಸಿಂಗ್, ನಾಲ್ಕು ಜನ ಹೆಣ್ಣುಮಕ್ಕಳು ಒಂದು ಗಂಡು ಮಗುವನ್ನ ಕರುಣಿಸಿರುವ ಪಾಪಿ ಪತಿ ರಾಜೇಶ್ ಸಿಂಗ್ ಗೆ ಡಿವೋರ್ಸ್ ನೀಡಿದ್ದಾರೆ. ಆದರೂ ಆತ ಹಣಕ್ಕಾಗಿ ಪತ್ನಿ ಮಕ್ಕಳನ್ನು ಪೀಡಿಸುತ್ತಿದ್ದಾನೆ.

ಈಗಾಗಲೇ ಇನ್ನೂ ಇಬ್ಬರು ಪತ್ನಿಯರನ್ನು ಹೊಂದಿರುವ ರಾಜೇಶ್ ಸಿಂಗ್ ಏಪ್ರಿಲ್ 2018ರಲ್ಲಿ ವಿವಾಹ ವಿಚ್ಛೇದನವಾದರೂ ಜೊತೆಗೆ ಸಂಸಾರ ಮಾಡು ಎಂದು ಪೀಡಿಸುತ್ತಿದ್ದಾನೆ. ನಿತ್ಯ ಕುಡಿದು ಬಂದು ಹಣಕ್ಕಾಗಿ ಪತ್ನಿ ಮಕ್ಕಳನ್ನು ಹೊಡೆಯುತ್ತಿದ್ದಾನೆ. ಹೀಗಾಗಿ ನೊಂದ ಗೀತಾ ಸಿಂಗ್ ವಿವಾಹ ವಿಚ್ಚೇದನ ಪಡೆದಿದ್ದಾರೆ. ಆದರೆ ರಾಜೇಶ್ ಹಾಗೂ ಅವನ ಸಹೋದರರು ಮತ್ತು ಗೀತಾ ಸಿಂಗ್ ಸಂಬಂಧಿಕರು ಒಟ್ಟಾಗಿರುವಂತೆ ಕಿರುಕುಳ ನೀಡುತ್ತಿದ್ದಾರೆ.

ಒಂದಾಗದಿದ್ದರೇ ವಯಸ್ಸಿಗೆ ಬಂದ ಹೆಣ್ಣು ಮಕ್ಕಳನ್ನ ಅತ್ಯಾಚಾರ ಮಾಡುವುದಾಗಿ ಅಣ್ಣನ ಮಕ್ಕಳೇ ಬೆದರಿಸುತ್ತಿದ್ದಾರೆ ಎಂದು ಗೀತಾ ಸಿಂಗ್ ಆರೋಪಿಸಿದ್ದಾರೆ. ರಾಜೇಶ್ ಹಣಕ್ಕಾಗಿ ಕಿರುಕುಳ ನೀಡುವುದಲ್ಲದೆ ಒಟ್ಟಾಗಿ ಬಾಳದಿದ್ದರೆ ಜೀವ ಉಳಿಸಲ್ಲ ಎಂದು ಬೆದರಿಕೆ ಹಾಕುತ್ತಿದ್ದಾನೆ. ಹಣ ಹೆಂಡದ ಆಸೆಗೆ ಗೀತಾ ಸಹೋದರರು ಸಹ ಪಾಪಿ ಪತಿಯ ಮಾತನ್ನೇ ಕೇಳುತ್ತಿದ್ದಾರೆ. ಮಾತು ಕೇಳದಿದ್ದರೇ ತಂಗಿಯ ಮಕ್ಕಳನ್ನೇ ಅತ್ಯಾಚಾರ ಮಾಡುವುದಾಗಿ ಹೆದರಿಸುತ್ತಿದ್ದಾರೆ. ಇದರಿಂದ ನೊಂದ ಮಹಿಳೆ ಜಿಲ್ಲಾಧಿಕಾರಿ ಕಚೇರಿ ಎದುರು ವಿಷಕುಡಿದು ಸಾಯುವುದಾಗಿ ಹೇಳುತ್ತಿದ್ದಾರೆ.

ಸಂಬಂಧಿಕರು ಏಕಾಏಕಿ ಮನೆಗೆ ನುಗ್ಗಿ ಗಲಾಟೆ ಮಾಡಿ ಕಿವಿಯೋಲೆಯನ್ನು ಕಿತ್ತುಕೊಂಡು ಹೋಗಿದ್ದಾರೆ. ಗೀತಾ ಸಿಂಗ್ ಸಹೋದರರ ಮಕ್ಕಳಾದ ರೋಹಿತ್, ರಾಹುಲ್, ವಿಶಾಲ್, ಸುಮಿತ್, ರಾಜೀವ್ ನಿಮ್ಮ ಮಕ್ಕಳಿಗೆ ಮದುವೆಯಾಗದಂತೆ ನೋಡಿಕೊಳ್ಳುತ್ತೇವೆ ಎಂದು ಬೆದರಿಸಿದ್ದಾರೆ. ಈಗಾಗಲೇ ಎಸ್‍ಪಿ, ಡಿಸಿ ಸೇರಿದಂತೆ ಎಲ್ಲಾ ಅಧಿಕಾರಿಗಳಿಗೂ ಈ ತಾಯಿ ಮಕ್ಕಳು ದೂರು ನೀಡಿದ್ದಾರೆ. ಆದರೆ ಕೌಟುಂಬಿಕ ವಿಚಾರ ಎಂದು ಯಾರೂ ತಲೆಕೆಡಿಸಿಕೊಂಡಂತೆ ಕಾಣುತ್ತಿಲ್ಲ. ಕೆಲ ಅಧಿಕಾರಿಗಳು ಇನ್ನೂ ರೇಪ್ ಆಗಿಲ್ಲವಲ್ಲಾ ಎನ್ನುವ ಉಡಾಫೆ ಮಾತನಾಡಿದ್ದಾರೆ ಎಂದು ಗೀತಾ ಮಗಳು ತನ್ನ ಅಲವತ್ತುಕೊಂಡಿದ್ದಾರೆ.

ಈ ಬಗ್ಗೆ ಮಹಿಳಾ ಪೊಲೀಸ್ ಠಾಣೆಗೆ ದೂರು ನೀಡಿದರು ಪೊಲೀಸರು ದೂರು ಸ್ವೀಕರಿಸುತ್ತಿಲ್ಲ. ಹೀಗಾಗಿ ಯಾವ ಅಧಿಕಾರಿಗಳು ಸ್ಪಂದಿಸದಿದ್ದದೆ ಜಿಲ್ಲಾಧಿಕಾರಿ ಕಚೇರಿ ಎದುರು ಐದು ಮಕ್ಕಳೊಂದಿಗೆ ವಿಷ ಕುಡಿದು ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಗೀತಾ ಸಿಂಗ್ ಎಚ್ಚರಿಕೆ ನೀಡಿದ್ದಾರೆ.