ಬಾಬಾ ರಾಮ್‍ರಹೀಮ್ ಸಿಂಗ್ ಆಸ್ತಿಗೆ ಕೊನೆಗೂ ಸಿಕ್ಕಳು ಉತ್ತರಾಧಿಕಾರಿ!

ಬೆಂಗಳೂರು: ಡೇರಾ ಸಚ್ಚಾ ಸೌಧದ ಮುಖ್ಯಸ್ಥ ಜೈಲುಪಾಲಾಗಿರುವ ಹಿನ್ನೆಲೆಯಲ್ಲಿ ಇದೀಗ ಎಲ್ಲರಿಗೂ ಮೂಡಿರುವ ಪ್ರಶ್ನೆ ಎಂದರೆ ದೇಶ, ವಿದೇಶಗಳಲ್ಲಿರುವ ಸಂಸ್ಥೆಗಳಿಗೆ ಯಾರು ಉತ್ತರಾಧಿಕಾರಿ ಎಂಬುದು. ಈ ಪ್ರಶ್ನೆಗೆ ಉತ್ತರವೂ ಸಿಕ್ಕಂತೆ ಕಾಣ್ತಿದೆ.

ರಾಮ್ ರಹೀಂ ಬಾಬಾ ಅಪರಾಧಿ ಎಂದು ಕೋರ್ಟ್ ತೀರ್ಪು ನೀಡಿದಾಗ ಬಾಬಾ ಜೊತೆಯಲ್ಲೇ ಕಾಣಿಸಿಕೊಂಡಿದ್ದ ಮಹಿಳೆ ಹಾಗೂ ಬಾಬಾ ಮಗಳೆಂದೇ ಕರೆಯಲ್ಪಡುತ್ತಿರುವ ಹನಿಪ್ರೀತ್ ಇನ್ಸಾನ್ ಮುಂದಿನ ಉತ್ತರಾಧಿಕಾರಿಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಯಾರು ಈ ಹನಿಪ್ರೀತ್ ಇನ್ಸಾನ್?: ಹನಿಪ್ರೀತ್ ಇಸಾನ್ ಮೂಲ ಹೆಸರು ಪ್ರಿಯಾಂಕ ತನೇಜಾ. ಹನಿಪ್ರೀತ್ ಹರಿಯಾಣ ರಾಜ್ಯದ ಹಿಸ್ಸಾರ್ ಜಿಲ್ಲೆಯ ಫತೇಪುರ ಮೂಲದ ಮಹಿಳೆ. ಹನಿಪ್ರೀತ್ 1999ರಲ್ಲಿ ಸಿರ್ಸಾದ ಬಾಬಾ ರಾಮ್ ರಹೀಂ ಹಿಂಬಾಲಕನನ್ನು ಮದ್ವೆಯಾಗಿದ್ದರು. ಮದ್ವೆಯಾದ ಬಳಿಕ ಗಂಡನ ಮನೆಯವರು ವರದಕ್ಷಿಣೆ ಕಿರುಕುಳ ನೀಡುತ್ತಿದ್ದಾರೆ ಎಂದು ಹೇಳಿ ಬೇರೆಯಾಗಿದ್ದರು. 2009ರಲ್ಲಿ ಹನಿಪ್ರೀತ್ ಇನ್ಸಾನ್ ರನ್ನು ಬಾಬಾ ಮಗಳಾಗಿ ದತ್ತು ಪಡೆದುಕೊಂಡಿದ್ದಾರೆ.

ಅಂದಿನಿಂದ ಮಗಳಾದ ಹನಿಪ್ರೀತ್ ಬಾಬಾನ ಎಲ್ಲ ಆಪ್ತ ವ್ಯವಹಾರಗಳನ್ನು ನೋಡಿಕೊಳ್ಳುತ್ತಿದ್ದಾರೆ. ಡೇರಾ ಸಚ್ಚಾ ಸೌಧ ಮಾತ್ರ ಹನಿಪ್ರೀತ್ ಮತ್ತು ಬಾಬಾ ನಡುವೆ ಕೇವಲ ಅಪ್ಪ-ಮಗಳ ಸಂಬಂಧವಿದೆ ಎಂದು ಹೇಳಿದೆ. ಆದರೆ ಮೆಸೆಂಜರ್ ಆಫ್ ಗಾಡ್ ಸಿನಿಮಾದಲ್ಲಿ ಬಾಬಾಗೆ ಹೀರೋಯಿನ್ ಆಗಿ ಹನಿಪ್ರೀತ್ ಕಾಣಿಸಿಕೊಂಡಿದ್ದು, ಸಾಕಷ್ಟು ಅನುಮಾನಗಳನ್ನು ಹುಟ್ಟು ಹಾಕಿದೆ.