ಪತಿ ಮೃತಪಟ್ಟ 1 ಗಂಟೆಯಲ್ಲೇ ಪತ್ನಿಯೂ ಸಾವು- ಸಾವಿನಲ್ಲೂ ಒಂದಾದ ಉಡುಪಿ ದಂಪತಿ

ಉಡುಪಿ: ತಾಳಿ ಕಟ್ಟುವಾಗ ಜೀವನದುದ್ದಕ್ಕೂ ಜೊತೆಗಿರುತ್ತೇವೆ ಎಂದು ಸಂಕಲ್ಪ ಮಾಡಿದ್ದ ದಂಪತಿಗಳು ಸಾವಿನಲ್ಲೂ ಜೊತೆಯಾಗಿ ಕೊನೆಯುಸಿರೆಳೆದ ಘಟನೆ ಉಡುಪಿಯಲ್ಲಿ ನಡೆದಿದೆ.

ಇಲ್ಲಿನ ಅಂಬಲಪಾಡಿ ಕಪ್ಪೆಟ್ಟು ರಾಮಮಂದಿರದ ಬಳಿ ಇಂತದ್ದೊಂದು ಸಾವು ಸಂಭವಿಸಿದೆ. ಸೋಮಯ್ಯ ಶೆಟ್ಟಿಗಾರ್(85) ಹಾಗೂ ನೇತ್ರಾವತಿ ಶೆಟ್ಟಿಗಾರ್(76) ಸಾವಿನಲ್ಲೂ ಒಂದಾದ ದಂಪತಿ.

ಮೂವರು ಹೆಣ್ಣುಮಕ್ಕಳು ಹಾಗೂ ಓರ್ವ ಮಗನನ್ನು ದಂಪತಿ ಅಗಲಿದ್ದಾರೆ. ಈ ಇಬ್ಬರೂ ಜೀವನದುದ್ದಕ್ಕೂ ಅನ್ಯೋನ್ಯ ದಾಂಪತ್ಯವನ್ನು ಕಳೆದು ವೃದ್ಧಾಪ್ಯದಲ್ಲಿ ಅಲ್ಪಕಾಲದ ಅನಾರೋಗ್ಯದಿಂದ ಬಳಲುತ್ತಿದ್ದರು. ಸೋಮಯ್ಯ ಅಸ್ತಮಾ ಕಾಯಿಲೆ ಚಿಕಿತ್ಸೆ ಪಡೆದು ಗುಣಮುಖರಾಗಿ ಆಸ್ಪತ್ರೆಯಿಂದ ಮನೆಗೆ ಬಂದಾಗ ಹೆಂಡತಿ ನೇತ್ರಾವತಿ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಮನೆಗೆ ಬಂದ ಪತಿಗೆ ಆರೋಗ್ಯ ಮತ್ತೆ ಗಂಭೀರ ಸ್ಥಿತಿಗೆ ತಲುಪಿ ಮೃತಪಟ್ಟಿದ್ದಾರೆ.

ಒಂದು ಗಂಟೆಯ ಬಳಿಕ ಆಸ್ಪತ್ರೆಯಲ್ಲಿದ್ದ ಪತ್ನಿ ನೇತ್ರಾವತಿ ಆರೋಗ್ಯ ಏಕಾಏಕಿ ಗಂಭೀರವಾಗಿ ಅಸುನೀಗಿದ್ದಾರೆ. ಜೀವನದ ಕೊನೆಗಾಲದವರೆಗೂ ಅನ್ಯೋನ್ಯತೆ ಮೆರೆದ ದಂಪತಿಯನ್ನು ಬೀಡಿನಗುಡ್ಡೆಯ ಹಿಂದೂ ರುದ್ರಭೂಮಿಯಲ್ಲಿ ಅಂತ್ಯಸಂಸ್ಕಾರ ಮಾಡಲಾಗಿದೆ

ಒಂದು ದಿನವೂ ಜಗಳವಾಡಿಕೊಂಡಿಲ್ಲ, ಮುನಿಸಿಕೊಂಡಿಲ್ಲ. ಕೊನೆಗೆ ಸಾವಿನಲ್ಲೂ ಒಬ್ಬರನ್ನೊಬ್ಬರು ಬಿಟ್ಟು ಕೊಡಲಿಲ್ಲ ಎಂದು ಮೃತ ದಂಪತಿಯ ಮಕ್ಕಳು ಹಾಗೂ ಸಂಬಂಧಿಕರು ಕಣ್ಣೀರಿಟ್ಟರು.