ದೇವಸ್ಥಾನದಲ್ಲಿಯೇ ಪುರೋಹಿತರಿಂದ 5ರ ಬಾಲಕಿ ಮೇಲೆ ಅತ್ಯಾಚಾರ

ಭೋಪಾಲ್: ದೇವಸ್ಥಾನದ ಆವರಣದಲ್ಲಿಯೇ 5 ವರ್ಷದ ಬಾಲಕಿಯ ಮೇಲೆ ಎಸಗಿದ್ದ ಇಬ್ಬರು ಪುರೋಹಿತರನ್ನು ಮಧ್ಯಪ್ರದೇಶದ ಪೊಲೀಸರು ಬಂಧಿಸಿದ್ದಾರೆ.

ರಾಜು ಪಂಡಿತ್ (55) ಹಾಗೂ ಬಟೋಲಿ ಪ್ರಜಾಪತಿ ಬಂಧಿತ ಆರೋಪಿಗಳು. ಇಬ್ಬರು ದಾಟಿಯಾ ಜಿಲ್ಲೆಯ ಗೋರ್‍ಘಾಟ್‍ದ ದೇವಸ್ಥಾನವೊಂದರ ಅರ್ಚಕಗಾರಿದ್ದು, ಇದೇ ತಿಂಗಳ 2ರಂದು ಕೃತ್ಯ ಎಸಗಿದ್ದಾರೆ.

ಘಟನೆ ವಿವರ:
ರಾಜು ಹಾಗೂ ಬಟೋಲಿ ಎಂಬ ಇಬ್ಬರು ಪುರೋಹಿತರು 5 ವರ್ಷದ ಬಾಲಕಿಗೆ ಸಿಹಿ ಪ್ರಸಾದ ನೀಡಲು ಕರೆದಿದ್ದಾರೆ. ಬಾಲಕಿ ದೇವಸ್ಥಾನದ ಒಳಗೆ ಬರುತ್ತಿದ್ದಂತೆ ಕೂಡಿಹಾಕಿ, ಸಾಮೂಹಿಕ ಅತ್ಯಾಚಾರ ಎಸಗಿದ್ದಾರೆ. ಈ ವೇಳೆ ಯಾರಿಗೂ ಅತ್ಯಾಚಾರ ಮಾಡಿದ ಕುರಿತು ತಿಳಿಸಿದಂತೆ ಎಚ್ಚರಿಕೆ ನೀಡಿದ್ದಾರೆ. ಅಲ್ಲದೇ ಯಾರಿಗೂ ಗೊತ್ತಾಗದಂತೆ ದೇವಸ್ಥಾನದಿಂದ ಬಾಲಕಿಯನ್ನು ಕರೆತಂದು ಆಕೆಯ ಮನೆಯ ಎದುರು ಬಿಟ್ಟು ಅಲ್ಲಿಂದ ಪರಾರಿಯಾಗಿದ್ದಾರೆ.

ಬಾಲಕಿ ಅಸ್ವಸ್ಥವಾಗಿ ಕಾಣುತ್ತಿದ್ದರಿಂದ ತಾಯಿ ವಿಚಾರಿಸಿದ್ದಾರೆ. ಆದ್ರೆ ಬಾಲಕಿ ಮಾತ್ರ ಘಟನೆಯ ಕುರಿತು ವಿವರಿಸಲು ಹಿಂದೇಟು ಹಾಕಿದ್ದಾಳೆ. ಆದರೆ ಏನಾಗಿದೆ ನಿನಗೆ ಅಂತಾ ತಾಯಿ ಗದರಿಸಿದಾಗ, ತನ್ನ ಮೇಲೆ ಇಬ್ಬರು ಪುರೋಹಿತರು ಅತ್ಯಾಚಾರ ಎಸಗಿದ್ದಾರೆ ಅಂತಾ ಬಾಲಕಿ ಹೇಳಿಕೊಂಡಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಪೋಷಕರು ತಕ್ಷಣವೇ ಬಾಲಕಿಯನ್ನು ಜಿಲ್ಲಾಸ್ಪತ್ರೆಗೆ ಸಾಗಿಸಿ ಚಿಕಿತ್ಸೆ ಕೊಡಿಸಿದ್ದಾರೆ. ಈ ಕುರಿತು ದಾಟಿಯಾ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ತನಿಖೆ ಚುರುಕುಗೊಳಿಸಿದ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ. ಇಬ್ಬರು ಆರೋಪಿ ಪುರೋಹಿತರ ವಿರುದ್ಧ ಪೋಕ್ಸೋ ಕಾಯ್ದೆ ಹಾಗೂ ಐಪಿಸಿ ವಿಧಿ 376 (ಅತ್ಯಾಚಾರ) ಅಡಿ ಪ್ರಕರಣ ದಾಖಲಾಗಿದೆ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv