370 ರದ್ದತಿಗೆ ವರ್ಷ- ಬಿಜೆಪಿ ನಾಯಕನಿಗೆ ಉಗ್ರರ ಗುಂಡೇಟು

-ಪೊಲೀಸ್ ಪೋಸ್ಟ್ ಮೇಲೆ ಗ್ರೆನೆಡ್ ದಾಳಿ

ಶ್ರೀನಗರ: ಜಮ್ಮು-ಕಾಶ್ಮೀರಕ್ಕೆ ನೀಡಲಾಗಿದ್ದ ವಿಶೇಷ ಸ್ಥಾನಮಾನ ರದ್ದುಗೊಳಿಸಿದ ಇಂದಿಗೆ ಒಂದು ವರ್ಷವಾಗಿದೆ. ಈ ಹಿನ್ನೆಲೆ ಜಮ್ಮು ಕಾಶ್ಮೀರದಲ್ಲಿ ಎರಡು ದಿನ ಕರ್ಫ್ಯೂ ವಿಧಿಸಲಾಗಿದೆ. ಮಂಗಳವಾರ ಸ್ಥಳೀಯ ಬಿಜೆಪಿ ಮುಖಂಡನ ಮೇಲೆ ಉಗ್ರರು ಗುಂಡಿನ ದಾಳಿ ನಡೆಸಿದ್ದಾರೆ.

ಆರಿಫ್ ಅಹ್ಮದ್ ಶಾ ಗುಂಡಿನ ದಾಳಿಗೊಳಗಾದ ಸ್ಥಳೀಯ ಬಿಜೆಪಿ ಮುಖಂಡ. ಕುಲಗಾಮ ಜಿಲ್ಲೆಯ ಅಖರಾನ್ ವ್ಯಾಪ್ತಿಯಲ್ಲಿ ರಾತ್ರಿ ಸುಮಾರು 9.30ಕ್ಕೆ ಉಗ್ರರು ಆರಿಫ್ ಮೇಲೆ ಗುಂಡು ಹಾರಿಸಿದ್ದಾರೆ. ಕೂಡಲೇ ಆರಿಫ್ ಅವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗಿದೆ.

ಇತ್ತ ಪುಲ್ವಾಮಾದಲ್ಲಿ ಮಂಗಳವಾರ ತಡರಾತ್ರಿ ವನ್ಪೊರಾ ಪೊಲೀಸ್ ಪೋಸ್ಟ್ ಮೇಲೆ ಆತಂಕವಾದಿಗಳು ಗ್ರೆನೆಡ್ ದಾಳಿ ನಡೆಸಿದ್ದಾರೆ. ದಾಳಿಯಲ್ಲಿ ಮೂವರು ಪೊಲೀಸರು ಗಾಯಗೊಂಡಿರುವ ಬಗ್ಗೆ ವರದಿಯಾಗಿದೆ. ಗ್ರೆನೆಡ್ ದಾಳಿಯಾಗ್ತಿದ್ದಂತೆ ಪೊಲೀಸರು ಸಹ ಫೈರಿಂಗ್ ಮಾಡಿದ್ದಾರೆ.