15ರ ಕ್ಯಾನ್ಸರ್ ರೋಗಿ ಮೇಲೆ ಗ್ಯಾಂಗ್‍ರೇಪ್ ಮಾಡಿ ಬೀದಿಗೆಸೆದ್ರು- ಸಹಾಯ ಕೇಳಿದವನಿಂದ್ಲೂ ಮತ್ತೆ ಅತ್ಯಾಚಾರ

ಲಕ್ನೋ: ಕ್ಯಾನ್ಸರ್ ರೋಗಿಯಾಗಿರೋ 15 ವರ್ಷದ ಬಾಲಕಿ ಮೇಲೆ ಸಾಮೂಹಿಕ ಅತ್ಯಾಚಾರವೆಸಗಿರೋ ಘಟನೆ ಉತ್ತರಪ್ರದೇಶದ ಲಕ್ನೋದಲ್ಲಿ ನಡೆದಿದೆ.

ವರದಿಯ ಪ್ರಕಾರ ಬಾಲಕಿಗೆ ಆರೋಪಿ ಪರಿಚಯಸ್ಥನಾಗಿದ್ದು, ತನ್ನ ಸ್ನೇಹಿತನೊಂದಿಗೆ ಸೇರಿ ಅತ್ಯಾಚಾರವೆಸಗಿದ್ದಾನೆ. ನಂತರ ಬಾಲಕಿಯನ್ನ ಬೀದಿಗೆ ಎಸೆದು ಪರಾರಿಯಾಗಿದ್ದಾರೆ. ಇಷ್ಟಾದ ಮೇಲೆ ಬಾಲಕಿ ಸಹಾಯ ಕೇಳಿದ ವ್ಯಕ್ತಿಯೂ ಆಕೆಯ ಮೇಲೆ ಅತ್ಯಾಚಾರವೆಸಗಿದ್ದಾನೆ. ಪೊಲೀಸರ ಪ್ರಕಾರ ಬಾಲಕಿ ಕ್ಯಾನ್ಸರ್‍ನಿಂದ ಬಳಲುತ್ತಿದ್ದು, ಲಕ್ನೋದ ಸರೋಜಿನಿನಗರ್ ಪ್ರದೇಶದ ನಾತ್ಕುರ್ ಗ್ರಾಮದ ನಿವಾಸಿಯಾಗಿದ್ದಾಳೆ.

ನಡೆದಿದ್ದೇನು?: ಬಾಲಕಿ ದೂರಿನಲ್ಲಿ ತಿಳಿಸಿರುವ ಪ್ರಕಾರ ಶನಿವಾರದಂದು ದಿನಸಿ ತರಲು ಹೋಗಿದ್ದಾಗ ಆಕೆಗೆ ಪರಿಚಯವಿದ್ದ ಶುಭಂ ಎಂಬಾತ ಮನೆಗೆ ಡ್ರಾಪ್ ಮಾಡೋದಾಗಿ ಕರೆದಿದ್ದಾನೆ. ಆದ್ರೆ ಬಳಿಕ ನಿರ್ಜನ ಪ್ರದೇಶಕ್ಕೆ ಕರೆದೊಯ್ದು ಅಲ್ಲಿ ಆತ ಮತ್ತು ಆತನ ಸ್ನೇಹಿತ ಸುಮಿತ್ ಸೇರಿ ರಾತ್ರಿ 11 ಗಂಟೆವರೆಗೆ ಸಾಮೂಹಿಕ ಅತ್ಯಾಚಾರವೆಸಗಿದ್ದಾರೆ. ನಂತರ ಆಕೆಯನ್ನು ರಸ್ತೆಯ ಬದಿ ಎಸೆದು ಸ್ಥಳದಿಂದ ಪರಾರಿಯಾಗಿದ್ದಾರೆ.

ನಂತರ ಅದೇ ರಸ್ತೆಯಲ್ಲಿ ಬೈಕ್‍ನಲ್ಲಿ ಹೋಗುತ್ತಿದ್ದ ಸ್ಥಳೀಯ ಕಂಟ್ರಾಕ್ಟರ್ ವೀರೇಂದ್ರ ಯಾದವ್‍ನನ್ನು ತಡೆದ ಬಾಲಕಿ ಸಹಾಯಕ್ಕಾಗಿ ಕೋರಿದ್ದು, ಆತ ಸಹಾಯ ಮಾಡೋ ಬದಲು ಅತ್ಯಾಚಾರವೆಸಗಿದ ಎಂದು ಬಾಲಕಿ ಹೇಳಿದ್ದಾಳೆ. ನಂತರ ಆಕೆಯನ್ನು ಅಲ್ಲೇ ಬಿಟ್ಟು ಆತನೂ ಹೊರಟುಹೋಗಿದ್ದು, ಬಾಲಕಿ ಕೆಲವು ಗಂಟೆಗಳ ಕಾಲ ರಸ್ತೆಯಲ್ಲೇ ಬಿದ್ದಿದ್ದಳು ಎಂದು ವರದಿಯಾಗಿದೆ.

ಮಧ್ಯರಾತ್ರಿ 2 ಗಂಟೆ ವೇಳೆಗೆ ಸ್ಥಳೀಯ ನಿವಾಸಿಗಳು ಪೊಲೀಸರಿಗೆ ವಿಷಯ ತಿಳಿಸಿದ್ದು, ಸ್ಥಳಕ್ಕೆ ಬಂದ ಪೊಲೀಸರು ಆಕೆಯನ್ನು ಮನೆಗೆ ಕರೆದುಕೊಂಡು ಹೋಗಿದ್ದಾರೆ. ಈ ಬಗ್ಗೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ಆರೋಪಿ ಕಂಟ್ರಾಕ್ಟರ್‍ನನ್ನು ಬಂಧಿಸಿದ್ದಾರೆ. ತಲೆಮರೆಸಿಕೊಂಡಿರುವ ಇನ್ನಿಬ್ಬರು ಆರೋಪಿಗಳಿಗಾಗಿ ಬಲೆ ಬೀಸಿದ್ದಾರೆ.

ಕಳೆದ 5 ವರ್ಷಗಳಿಂದ ಬಾಲಕಿ ಬ್ಲಡ್ ಕ್ಯಾನ್ಸರ್‍ಗಾಗಿ ಲಕ್ನೋದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾಳೆಂದು ವರದಿಯಾಗಿದೆ.