ಸಾವನ್ನಪ್ಪಿದ ನಂತ್ರ 3 ದಿನ ಕಾರಿನಲ್ಲೇ ಇತ್ತು ಶವ!

– ಡೋರ್, ವಿಂಡೋ ಕ್ಲೋಸ್ ಆಗಿತ್ತು
– ನಾಪತ್ತೆ ದೂರು ದಾಖಲಿಸಿದ್ದ ಕುಟುಂಬ

ಮಂಡ್ಯ: ಅನಾರೋಗ್ಯದಿಂದ ಕಾರಿನಲ್ಲೇ ವ್ಯಕ್ತಿಯೋರ್ವ ಸಾವನ್ನಪ್ಪಿದ್ದು, ಮೃತ ದೇಹ ಮೂರು ದಿನಗಳ ಕಾಲ ಕಾರಿನಲ್ಲೇ ಮೃತ ದೇಹವಿದ್ದ ಘಟನೆ ಮಂಡ್ಯದ ಮಿಮ್ಸ್ ಆಸ್ಪತ್ರೆಯ ಬಳಿ ಜರುಗಿದೆ.

ಮಂಡ್ಯ ಜಿಲ್ಲೆಯ ಮಳವಳ್ಳಿ ತಾಲೂಕಿನ ಕಿರಗಾವಲು ಗ್ರಾಮದ ಶಿವಕುಮಾರ್ (42) ಸಾವನ್ನಪ್ಪಿರುವ ವ್ಯಕ್ತಿ. ಶಿವಕುಮಾರ್ ಕಿರುಗಾವಲಿನಿಂದ ಕಳೆದ ಮೂರು ದಿನಗಳ ಹಿಂದೆ ಮಂಡ್ಯ ನಗರಕ್ಕೆ ಕಾರಿನಲ್ಲಿ ಬಂದಿದ್ದಾರೆ. ಈ ವೇಳೆ ಮಿಮ್ಸ್ ಆಸ್ಪತ್ರೆಯ ಎದುರು ಕಾರು ನಿಲ್ಲಿಸಿಕೊಂಡಿದ್ದು, ಇದ್ದಕ್ಕಿದ್ದ ಹಾಗೆ ಸಾವನ್ನಪ್ಪಿದ್ದಾರೆ.

ಕಾರಿನ ಡೋರ್, ವಿಂಡೋ ಮುಚ್ಚಿದ್ದ ಕಾರಣ ಯಾರಿಗೂ ಸಹ ತಿಳಿದಿಲ್ಲ. ಶಿವಕುಮಾರ್ ಮನೆಗೆ ಬಾರದ ಕಾರಣ ಕುಟುಂಬಸ್ಥರು ಕಿರುಗಾವಲು ಪೊಲೀಸ್ ಠಾಣೆಯಲ್ಲಿ ಕಾಣೆಯಾಗಿದ್ದಾರೆ ಎಂದು ದೂರು ನೀಡಿದ್ದರು. ಮೂರು ದಿನಗಳಿಂದ ಕಾರು ಇದ್ದ ಜಾಗದಲ್ಲೇ ಇದ್ದ ಕಾರಣ ಸಾರ್ವಜನಿಕರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಕೂಡಲೇ ಸ್ಥಳಕ್ಕೆ ಬಂದು ಪೊಲೀಸರು ಪರಿಶೀಲನೆ ಮಾಡಿದ ವೇಳೆ ಶಿವಕುಮಾರ್ ಮೃತರಾಗಿರುವುದು ತಿಳಿದು ಬಂದಿದೆ.

ಮಿಮ್ಸ್ ಆಸ್ಪತ್ರೆಯಲ್ಲಿ ಶವ ಪರೀಕ್ಷೆ ನಡೆಸಿ ಕುಟುಂಬಸ್ಥರಿಗೆ ಹಸ್ತಾಂತರ ಮಾಡಲಾಗಿದೆ. ಈ ಕುರಿತು ಮಂಡ್ಯ ಪೂರ್ವ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.