ಶಾಲಾ ದಿನಗಳಿಂದ ಪ್ರೀತಿ, ಒಪ್ಪದ ಯುವತಿಯ ಪೋಷಕರ ಮುಂದೆಯೇ ಇರಿದು ಕೊಂದ

– ಪ್ರಜ್ಞೆ ತಪ್ಪಿದ ತಾಯಿ, ತಂದೆಯ ಮುಂದೆಯೇ ಮಗಳ ಬರ್ಬರ ಹತ್ಯೆ
– ಮದುವೆ ಫಿಕ್ಸ್ ಆಗಿದ್ದ ಪ್ರಿಯತಮೆಯ ಕುತ್ತಿಗೆ ಚಾಕು ಇರಿದ ಪ್ರೇಮಿ

ಲಕ್ನೋ: ಯುವಕನೋರ್ವ ಶಾಲಾ ದಿನಗಳಿಂದ ಓರ್ವ ಯುವತಿಯನ್ನು ಪ್ರೀತಿಸಿ ಅವಳು ಒಪ್ಪದೇ ಇದ್ದಿದ್ದಕ್ಕೆ ಆಕೆಯ ಪೋಷಕರ ಮುಂದೆಯೇ ಚಾಕುವಿನಿಂದ ಇರಿದು ಕೊಂದಿರುವ ಘಟನೆ ಉತ್ತರ ಪ್ರದೇಶದ ಗಾಜಿಯಾಬಾದ್‍ನಲ್ಲಿ ನಡೆದಿದೆ.

ಪೊಲೀಸರ ಪ್ರಕಾರ ಸಂತ್ರಸ್ತೆಯನ್ನು ವಿವೇಕ್ ವಿಹಾರ್ ಕಾಲೋನಿ ನಿವಾಸಿ ನೈನಾ ಕೌರ್ (19) ಎಂದು ಗುರುತಿಸಲಾಗಿದೆ. ಆಕೆಯನ್ನು ಕೊಂದು ಪಾಗಲ್ ಪ್ರೇಮಿಯನ್ನು ಶೆರು ಖಾನ್ (22) ಎಂದು ಗುರುತಿಸಲಾಗಿದೆ. ನೈನಾ ತನ್ನ ಪೋಷಕರಾದ ಬಲದೇವ್ ಸಿಂಗ್ ಮತ್ತು ನೀಲಂ ಕೌರ್ ಜೊತೆ ವಾಸವಾಗಿದ್ದಳು. ಆಕೆ ನರ್ಸಿಂಗ್ ವಿದ್ಯಾರ್ಥಿಯಾಗಿದ್ದು, ನಾಗ್ಪುರ ಮೂಲದ ಯುವಕನ ಜೊತೆ ಜೂನ್ 22ಕ್ಕೆ ಮದುವೆ ಫಿಕ್ಸ್ ಆಗಿತ್ತು.

ಈ ಬಗ್ಗೆ ಮಾಹಿತಿ ನೀಡಿರುವ ಮೃತಳ ತಂದೆ, ನಾನು ನನ್ನ ಮಗಳು ಮತ್ತು ಪತ್ನಿ ಸಿಮ್ ಕಾರ್ಡ್ ಖರೀದಿಸಲು ಮಾರ್ಕೆಟ್‍ಗೆ ಹೋಗಿದ್ದವು. ಅಲ್ಲಿ ನೈನಾ ಮತ್ತು ಅವರ ತಾಯಿ ಚಿಲ್ಲಿ ತರಲು ಹೋಗಿದ್ದು, ನಾನು ಅಲ್ಲೆ ಅಂಗಡಿ ಬಳಿ ನಿಂತಿದ್ದೆ. ಅವರು ನನ್ನಿಂದ 50 ಮೀಟರ್ ದೂರ ಹೋದಾಗ ಮೂವರು ಒಂದು ಬೈಕಿನಲ್ಲಿ ಬಂದರು. ಅದರಲ್ಲಿ ಓರ್ವ ಮಾಸ್ಕ್ ಹಾಕಿಕೊಂಡಿದ್ದವನು ನೈನಾ ಕೈಹಿಡಿದು ಎಳೆದುಕೊಂಡು ಹಲ್ಲೆ ಮಾಡಲು ಆರಂಭ ಮಾಡಿದನು ಎಂದು ಹೇಳಿದ್ದಾರೆ.

ಈ ವೇಳೆ ನೈನಾ ತಾಯಿ ನೀಲಂ ಕೂಡ ಆಕೆಯನ್ನು ರಕ್ಷಿಸಲು ಪ್ರಯತ್ನ ಮಾಡಿದ್ದಾರೆ. ಆದರೆ ಆತ ಆಕೆಗೂ ಜೋರಾಗಿ ಹೊಡೆದ ಕಾರಣ ಪ್ರಜ್ಞೆ ತಪ್ಪಿ ಬಿದ್ದಿದ್ದಾರೆ. ಜೊತೆಯಲ್ಲಿ ಬಂದಿದ್ದ ಮತ್ತೋರ್ವ ನನ್ನನು ತಡೆದ. ತಾಯಿ ಬಿದ್ದ ತಕ್ಷಣ ನೈನಾ ಆತನಿಗೆ ಹೊಡೆದಳು. ಆಗ ಆತ ಚಾಕು ತೆಗೆದು ನೈನಾ ಕುತ್ತಿಗೆಗೆ, ಹೊಟ್ಟೆಗೆ ಸೇರಿ ದೇಹದ ವಿವಿಧ ಭಾಗಗಳಿಗೆ ಇರಿದು ಪರಾರಿಯಾದ. ಮಾರುಕಟ್ಟೆಯಲ್ಲಿ ಅಷ್ಟೊಂದು ಜನ ಇದ್ದರೂ ಯಾರು ನನ್ನ ಮಗಳನ್ನು ಉಳಿಸಲಿಲ್ಲ ಎಂದು ತಂದೆ ತಿಳಿಸಿದ್ದಾರೆ.

ಈ ವಿಚಾರದ ಬಗ್ಗೆ ಮಾಹಿತಿ ನೀಡಿರುವ ಪೊಲೀಸರು, ನೈನಾ ತಾಯಿ ಆರೋಪಿ ಹಾಕಿದ್ದ ಮಾಸ್ಕ್ ಅನ್ನು ಜಗಳದಲ್ಲಿ ಕಿತ್ತು ಹಾಕಿದ ಕಾರಣ ಆರೋಪಿಯನ್ನು ಗುರುತಿಸಲು ಸಾಧ್ಯವಾಯ್ತು. ಶೆರು ಖಾನ್ ಶಾಲಾದಿನದಿಂದ ನೈನಾಳನ್ನು ಪ್ರೀತಿಸುತ್ತಿದ್ದ. ಆದರೆ ನೈನಾ ನಿರಾಕರಿಸಿದ್ದಳು. ಈಗ ಆಕೆಯ ಮದುವೆ ಫಿಕ್ಸ್ ಆದ ಕಾರಣ ಹೀಗೆ ಮಾಡಿದ್ದಾನೆ. ಶೆರು ಪರಾರಿಯಾಗಿದ್ದು, ಆತನನ್ನು ಹುಡುಕುತ್ತಿದ್ದೇವೆ. ಉಳಿದ ಇಬ್ಬರು ಆರೋಪಿಗಳಾದ ಅಮೀರ್ ಚೌಧರಿ (20) ಮತ್ತು ಆಸಿಫ್ (22) ನನ್ನು ಬಂಧಿಸಲಾಗಿದೆ ಎಂದು ಹೇಳಿದ್ದಾರೆ.