ಲಾಕ್‍ಡೌನ್‍ಗೆ ಮೂರನೇ ದಿನ – ಬೆಳ್ಳಂಬೆಳಗ್ಗೆ ವಾಹನಗಳ ಓಡಾಟ, ಜನಸಂಚಾರ

– ಫುಟ್‍ಪಾತ್ ಮೇಲೆ ಭರ್ಜರಿ ವ್ಯಾಪಾರ

ಬೆಂಗಳೂರು: ದಿನೇ ದಿನೇ ಸಿಲಿಕಾನ್ ಸಿಟಿಯಲ್ಲಿ ಮಹಾಮಾರಿ ಕೊರೊನಾ ಸೋಂಕಿತರ ಸಂಖ್ಯೆ ಹೆಚ್ಚಾಗುತ್ತಿದೆ. ಗುರುವಾರ ಒಂದೇ ದಿನ 2,344 ಪ್ರಕರಣಗಳು ವರದಿ ಆಗಿದ್ದು, ಒಟ್ಟಾರೆ ಬೆಂಗಳೂರಿನಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ 25 ಸಾವಿರದ ಗಡಿ ದಾಟಿದೆ. ಇತ್ತ ಇಂದು ಲಾಕ್‍ಡೌನ್ ಜಾರಿಯಾಗಿ ಮೂರು ದಿನಗಳಾಗಿದೆ. ಆದರೂ ನಗರದಲ್ಲಿ ವಾಹನಗಳ ಓಡಾಟ ಜೋರಾಗಿದೆ.

ಬೆಂಗಳೂರಿನ ಬನಶಂಕರಿ ಭಾಗದಲ್ಲಿ ಅಪಾರ ಜನರು ಓಡಾಡುತ್ತಿದ್ದಾರೆ. ಜೊತೆಗೆ ವಾಹನಗಳ ಓಡಾಟವೂ ಸ್ವಲ್ಪ ಜೋರಾಗಿದೆ. ಜನರು ಸಾಮಾಜಿಕ ಅಂತರ ಮರೆತು ಓಡಾಡುತ್ತಿದ್ದಾರೆ. ಇತ್ತ ಮೆಟ್ರೋ ಸಂಚಾರ ಇಲ್ಲದ ಪರಿಣಾಮ ಈಗ ಮೆಟ್ರೋ ಸ್ಟೇಷನ್ ಜಗಲಿ ಕಟ್ಟೆಯಾಗಿದ್ದು, ಲಾಕ್‍ಡೌನ್ ಮಧ್ಯೆ ಸ್ಟೇಷನ್ ಬಳಿ ಜನರು ಕೂತಿದ್ದಾರೆ.

ಶಾಂತಿನಗರ ಲಾಲ್‍ಬಾಗ್ ಗೇಟ್ ರಸ್ತೆ ಈಗ ಸಂತೆಯಾಗಿದ್ದು, ಸಮೀಪದ ಕೆ.ಆರ್. ಮಾರ್ಕೆಟ್ ಕ್ಲೋಸ್ ಎಂದು ಜನರು ಫುಟ್ ಪಾತ್ ಮೇಲೆ ವ್ಯಾಪಾರ ಶುರು ಮಾಡಿದ್ದಾರೆ. ಬೆಳ್ಳಂಬೆಳಗ್ಗೆ ಯಶವಂತಪುರ ಮಾರ್ಕೆಟ್‍ನಲ್ಲಿ ವ್ಯಾಪಾರ ವಹಿವಾಟು ನಡೆಯುತ್ತಿದೆ. ಹಣ್ಣು,ಸೊಪ್ಪು ತರಕಾರಿ, ಹೂ, ಮೊಟ್ಟೆ ಮಾಂಸ ಅಂತ ಜನರು ಖರೀದಿಗಾಗಿ ಮನೆಯಿಂದ ಹೊರಗೆ ಬರುತ್ತಿದ್ದಾರೆ. ವಾಹನಗಳ ಓಡಾಟ ಕೂಡ ತುಸು ಹೆಚ್ಚಾಗಿಯೇ ಇದೆ.

ತುಮಕೂರು ರಸ್ತೆಯಲ್ಲಿ ಲಾಕ್‍ಡೌನ್ ಮೂರನೇ ದಿನ ಸಾಕಷ್ಟು ಸಂಖ್ಯೆಯಲ್ಲಿ ವಾಹನಗಳು ಓಡಾಡುತ್ತಿವೆ. ಮಾರ್ಗಸೂಚಿಗಳಲ್ಲಿ ಹಲವಾರು ಕೆಲಸ ಕಾರ್ಯಗಳಿಗೆ ಅನುಮತಿ ಕೊಟ್ಟಿರುವುದರಿಂದ ವಾಹನಗಳ ಸಂಚಾರ ಜಾಸ್ತಿ ಇದೆ ಎಂದು ಪೊಲೀಸರು ಹೇಳುತ್ತಿದ್ದಾರೆ.

ಸದ್ಯಕ್ಕೆ ಬೆಂಗಳೂರಿನ ದಕ್ಷಿಣ ಭಾಗದ ಕೊರೊನಾ ಹಾರ್ಟ್ ಸ್ಪಾಟ್ ಜಯನಗರ. ನಿತ್ಯ ನೂರಾರು ಸಂಖ್ಯೆಯಲ್ಲಿ ಪಾಸಿಟಿವ್ ಕೇಸ್‍ಗಳು ವರದಿಯಾಗಿದೆ. ಪರಿಣಾಮ ಲಾಕ್‍ಡೌನ್ ಮಧ್ಯೆ ಅಗತ್ಯ ವಸ್ತುಗಳ ಮಾರಾಟಕ್ಕೆ ಅವಕಾಶ ಇದ್ದರೂ ಗ್ರಾಹಕರು ಮಾತ್ರ ತಲೆ ಹಾಕುತ್ತಿಲ್ಲ. ಪರಿಣಾಮ ವ್ಯಾಪಾರಿಗಳು ಸಹ ಕೆಲವರು ಮಾತ್ರ ವ್ಯಾಪಾರ ಶುರು ಮಾಡಿದ್ದಾರೆ.