ಯಾದಗಿರಿ ಜಿಲ್ಲಾಧಿಕಾರಿ ಹೆಸರಲ್ಲಿ ನಕಲಿ ಇ-ಮೇಲ್

– ಮಹತ್ವದ ಮಾಹಿತಿ ಸೋರಿಕೆ ಶಂಕೆ
– ಸೈಬರ್ ಠಾಣೆಯಲ್ಲಿ ಎಫ್‍ಐಆರ್ ದಾಖಲು

ಯಾದಗಿರಿ: ಜಿಲ್ಲಾಧಿಕಾರಿ ಹೆಸರಿನಲ್ಲಿ ನಕಲಿ ಇ-ಮೇಲ್ ಐಡಿ ತಯಾರಿಸಿ ದುಷ್ಕರ್ಮಿಗಳು ಜಿಲ್ಲಾಮಟ್ಟದ ವಿವಿಧ ಇಲಾಖೆಯ ಗೌಪ್ಯ ಮಾಹಿತಿ ಸಂಗ್ರಹ ಮಾಡುವ ದಂಧೆ ಬೆಳಕಿಗೆ ಬಂದಿದೆ.

ಯಾದಗಿರಿ ಜಿಲ್ಲಾಧಿಕಾರಿ ಡಾ.ರಾಗಾಪ್ರಿಯಾ ಅವರ ಅಧಿಕೃತ ಕಚೇರಿಯ ಇ-ಮೇಲ್ ಐಡಿಯನ್ನೇ ದುಷ್ಕರ್ಮಿಗಳು ನಕಲು ಮಾಡಿದ್ದಾರೆ. ನಕಲಿ ಐಡಿ ಮೂಲಕ ಸರ್ಕಾರದ ಮಾಹಿತಿ ಮೇಲೆ ಕಣ್ಣು ಹಾಕಿದ ದುಷ್ಕೃತ್ಯ ಈಗ ಬೆಳಕಿಗೆ ಬಂದಿದೆ.

ಜಿಲ್ಲಾಧಿಕಾರಿ ಅವರ ಕಚೇರಿ ಮೇಲ್ ಮೂಲಕ ಪತ್ರ ಬಂದಿವೆಂದು ಉತ್ತರ ನೀಡಿ ಮಹತ್ವದ ಮಾಹಿತಿ ಕಳುಹಿಸಿದ ಜಿಲ್ಲಾಮಟ್ಟದ ಅಧಿಕಾರಿಗಳು ಈಗ ಶಾಕ್ ಆಗಿದ್ದಾರೆ. ಈ ಹಿಂದಿನ ಜಿಲ್ಲಾಧಿಕಾರಿ ಎಂ.ಕೂರ್ಮರಾವ್ ಅವಧಿಯಲ್ಲಿ ಸಹ ಇದೇ ರೀತಿಯ ಬೆಳವಣಿಗೆಯಾಗಿತ್ತು. ಹೀಗಾಗಿ ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಡಿಸಿ ರಾಗಪ್ರಿಯ, ಈ ಬಗ್ಗೆ ಸೈಬರ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.