ಬಾಲಕಿ ಮೇಲೆ ಬೀದಿ ನಾಯಿಗಳು ದಾಳಿ- ಒಂದೇ ದಿನದಲ್ಲಿ 5 ಆಸ್ಪತ್ರೆಗೆ ಅಲೆದ್ರೂ ಬದುಕಿಲ್ಲ

– ಆಟವಾಡುತ್ತಿದ್ದ 6ರ ಬಾಲಕಿಯ ಮೇಲೆ ನಾಲ್ಕೈದು ನಾಯಿ ದಾಳಿ
– ಮಗಳನ್ನ ಉಳಿಸಿಕೊಳ್ಳಲು ಪೋಷಕರು ಅಲೆದಾಟ

ಹೈದರಾಬಾದ್: ಆಟವಾಡುತ್ತಿದ್ದಾಗ ಆರು ವರ್ಷದ ಬಾಲಕಿಯ ಮೇಲೆ ಬೀದಿ ನಾಯಿಗಳು ದಾಳಿ ಮಾಡಿದ ಪರಿಣಾಮ ಬಾಲಕಿ ಮೃತಪಟ್ಟಿರುವ ಘಟನೆ ತೆಲಂಗಾಣದಲ್ಲಿ ನಡೆದಿದೆ. ಬಾಲಕಿ ಸಾಯುವ ಮುನ್ನ ಒಂದು ದಿನದಲ್ಲಿ ಸುಮಾರು ಐದು ಆಸ್ಪತ್ರೆಗಳಿಗೆ ಕರೆದುಕೊಂಡು ಹೋಗಲಾಗಿದೆ. ಆದರೂ ಬಾಲಕಿಯನ್ನು ಉಳಿಸಲು ಸಾದ್ಯವಾಗಿಲ್ಲ.

ಮೆಡ್ಚಲ್ ಜಿಲ್ಲೆಯ ಬಾಲಕಿ ಶನಿವಾರ ಬೆಳಗ್ಗೆ ಮನೆಯ ಮುಂದೆ ಆಟವಾಡುತ್ತಿದ್ದಳು. ಆಗ ಸುಮಾರು ನಾಲ್ಕೈದು ಬೀದಿ ನಾಯಿಗಳು ಒಮ್ಮೆಲೆ ಬಾಲಕಿಯ ಮೇಲೆ ದಾಳಿ ಮಾಡಿದೆ. ತಕ್ಷಣ ತೀವ್ರವಾಗಿ ಗಾಯಗೊಂಡ ಬಾಲಕಿಯನ್ನು ಮೊದಲಿಗೆ ಆದಿತ್ಯ ಆಸ್ಪತ್ರೆಗೆ ದಾಖಲಿಸಲಾಗಿದೆ. 2 ಗಂಟೆಗಳ ನಂತರ ಆಸ್ಪತ್ರೆಯವರು ಅಂಕುರಾ ಆಸ್ಪತ್ರೆಗೆ ಕರೆದುಕೊಂಡು ಹೋಗುವಂತೆ ಹೇಳಿದ್ದಾರೆ.

ಅದರಂತೆಯೇ ಕುಟುಂಬದವರು ತಕ್ಷಣ ಆ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಅಲ್ಲಿ ಮೂರು ಗಂಟೆಗಳ ಚಿಕಿತ್ಸೆಯ ನಂತರ ಬಾಲಕಿಯನ್ನು ಯಶೋದಾ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಗಿದೆ. ಆದರೆ ಅಲ್ಲಿ ಬಾಲಕಿಯನ್ನು ದಾಖಲಿಸಿಕೊಳ್ಳಲು ನಿರಾಕರಿಸಿದ್ದಾರೆ. ಬಳಿಕ ಕುಟುಂಬವರು ಮತ್ತೊಂದು ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ. ಕೊನೆಗೆ ಬಾಲಕಿಯನ್ನು ನಿಲೌಫರ್ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಅಲ್ಲಿ ಶನಿವಾರ ಸಂಜೆ ಬಾಲಕಿ ಮೃತಪಟ್ಟಿದ್ದಾಳೆ.

ಈ ಮೂಲಕ ಒಂದು ದಿನದಲ್ಲಿ ಐದು ಆಸ್ಪತ್ರೆಗೆ ಪೋಷಕರು ಅಲೆದಾಡಿದರೂ ಮಗುವನ್ನು ಉಳಿಸಿಕೊಳ್ಳಲು ಸಾಧ್ಯವಾಗಿಲ್ಲ. ಮಕ್ಕಳ ಹಕ್ಕುಗಳ ಕಾರ್ಯಕರ್ತೆ ಅಚ್ಯುತ ರಾವ್ ಅವರು, ಬೋಡುಪ್ಪಲ್ ಮಹಾನಗರ ಪಾಲಿಕೆ ನಿರ್ಲಕ್ಷ್ಯದ ವಿರುದ್ಧ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದ್ದಾರೆ. ಅಲ್ಲದೇ ಬಾಲಕಿಯ ಅಂತ್ಯಕ್ರಿಯೆಗೆ ನಿಗಮವು ಹಣಕಾಸಿನ ನೆರವು ನೀಡಿಲ್ಲ. ಬದಲಿಗೆ ಕುಟುಂಬದವರನ್ನು ಸೋಮವಾರ ಬರುವಂತೆ ಹೇಳಿದ್ದಾರೆ ಎಂದು ಆರೋಪಿಸಿದ್ದಾರೆ.

ಮಾಹಿತಿ ತಿಳಿದು ನಗರಸಭೆ ಆಯುಕ್ತ ಶಂಕರ್ ಕುಟುಂಬಕ್ಕೆ ಪರಿಹಾರ ನೀಡಲಾಗುವುದು ಎಂದು ಭರವಸೆ ನೀಡಿದ್ದಾರೆ.