ಪತ್ನಿ ಮೇಲಿನ ಸಿಟ್ಟಿನಿಂದ 16 ಮಂದಿಯನ್ನು ರೇಪ್ ಮಾಡಿ ಹತ್ಯೆಗೈದ ಪಾಪಿ!

– ಪೊಲೀಸರಿಂದ ಆರೋಪಿ ಬಂಧನ
– ವಿಚಾರಣೆಗ ಬಳಿಕ ಹೊರಬೀಳಲಿದೆ ಇನ್ನಷ್ಟು ಸತ್ಯ

ಹೈದರಾಬಾದ್: ತನ್ನ ಪತ್ನಿಯ ಮೇಲಿನ ಸಿಟ್ಟಿನಿಂದ ವ್ಯಕ್ತಿಯೊಬ್ಬ 16 ಮಂದಿಯ ಮೇಲೆ ಅತ್ಯಾಚಾರ ಎಸಗಿ ಬಳಿಕ ಬರ್ಬರವಾಗಿ ಕೊಲೆ ಮಾಡಿರುವ ಸಿನಿಮೀಯ ಘಟನೆಯೊಂದು ಹೈದರಾಬಾದ್ ನ ರಾಚಕೊಂಡದಲ್ಲಿ ನಡೆದಿದೆ.

ಆರೋಪಿಯನ್ನು ಮೈನಾ ರಾಮುಲು ಎಂದು ಗುರುತಿಸಲಾಗಿದೆ. ಈತ 16 ಮಹಿಳೆಯರ ಮೇಲೆ ಅತ್ಯಾಚಾರ ಎಸಗಿ ಕಾಮತೃಷೆ ತೀರಿಸಿಕೊಂಡ ಬಳಿಕ ಕೊಲೆ ಮಾಡಿದ್ದಾನೆ. ಈ ಮೂಲಕ ಆರೋಪಿ ವಿಕೃತ ಆನಂದ ಅನುಭವಿಸಿದ್ದಾನೆ.

ಮೈನಾ ಪತ್ನಿ ಪರಪುರುಷನ ಜೋತೆ ಓಡಿಹೋಗಿದ್ದೇ ಈತನ ವರ್ತನೆಗೆ ಕಾರಣ ಎಂದು ಪ್ರಾಥಮಿಕ ತನಿಖೆಯ ವೇಳೆ ಬೆಳಕಿಗೆ ಬಂದಿದೆ. ಆಕೆಯ ಮೇಲಿನ ಸಿಟ್ಟಿಗೆ ಮೈನಾ ಈ ಕೃತ್ಯ ಎಸಗಿದ್ದಾನೆ. ಮೈನಾ ದಿನಗೂಲಿ ಕೆಸಲ ಮಾಡುತ್ತಿದ್ದು, ವಿಪರೀತ ಮದ್ಯವ್ಯಸನಿಯಾಗಿದ್ದ. ಈತನ ಮೇಲೆ ಮೆದಕ್, ಸೈಬರಾಬಾದ್ ಮತ್ತು ರಾಚಕೊಂಡ ನಗರದಲ್ಲಿ ಕಳ್ಳತನ ಹಾಗೂ ದರೋಡೆ ಸೇರಿ 21 ಪ್ರಕರಣಗಳು ದಾಖಲಾಗಿದ್ದವು.

ಕೊಲೆ ಪ್ರಕರಣವೊಂದರಲ್ಲಿ ಈತನಿಗೆ ಜೀವಾವಧಿ ಶಿಕ್ಷೆ ಕೂಡ ಆಗಿತ್ತು. ಆದರೆ ಕಳೆದ ವರ್ಷ ಜುಲೈ ತಿಂಗಳಲ್ಲಿ ಪರೋಲ್ ಮೇಲೆ ಬಿಡುಗಡೆಗೊಂಡಿದ್ದನು. ಆ ನಂತರವೂ ತನ್ನ ವಿಕೃತಿಯನ್ನು ಮುಂದುವರಿಸಿದ್ದನು. ಈತ ಒಂಟಿ ಮಹಿಳೆಯರಿಗೆ ಹಣದ ಆಮಿಷ ತೋರಿಸಿ ಅವರನ್ನು ಲೈಂಗಿಕವಾಗಿ ಬಳಸಿಕೊಳ್ಳುತ್ತಿದ್ದ. ಮೊದಲು ಬಣ್ಣದ ಮಾತುಗಳಿಗೆ ಒಳಗಾಗುವ ಮಹಿಳೆಯನ್ನು ಪರಿಚಯ ಮಾಡಿಕೊಳ್ಳುತ್ತಿದ್ದ. ನಂತರ ಅವರಿಗೆ ದುಡ್ಡಿನ ಆಸೆ ತೋರಿಸಿ, ಡ್ರಿಂಕ್ಸ್ ಮಾಡಿಸಿ ಅವರ ಮೇಲೆ ಅತ್ಯಾಚಾರ ಎಸಗುತ್ತಾನೆ. ಕೊನೆಗೆ ಕತ್ತು ಹಿಸುಕಿ ಕೊಲೆ ಮಾಡಿ ಅವರ ಬಳಿ ಇದ್ದ ಹಣ, ಒಡವೆ ದೋಚಿ ಪರಾರಿಯಾಗುತ್ತಿದ್ದ.

ಒಟ್ಟಿನಲ್ಲಿ ಸದ್ಯ ಮೈನಾ 16 ಮಂದಿ ಮಹಿಳೆಯನ್ನು ಕೊಲೆ ಮಾಡಿರುವುದು ಬೆಳಕಿಗೆ ಬಂದಿದ್ದು, ವಿಚಾರಣೆಯ ಬಳಿಕ ಇನ್ನಷ್ಟು ಸತ್ಯ ಹೊರಬರಲಿದೆ.