ಕೊರೊನಾದಿಂದ ಗುಣಮುಖರಾಗಿ ಠಾಣೆಗೆ ಬಂದ ಮುಖ್ಯ ಪೇದೆಯನ್ನ ಸ್ವಾಗತಿಸಿದ ಶ್ವಾನ

ಧಾರವಾಡ: ಯಾವತ್ತೂ ಧಾರವಾಡದ ಪೊಲೀಸ್ ಠಾಣೆ ಎದುರಲ್ಲೇ ಇರುವ ಶ್ವಾನವೊಂದು, ಕೊರೊನಾ ಸೊಂಕಿನಿಂದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು ಬಂದ ಕೊರೊನಾ ವಾರಿಯರ್ ಗೆ ಸ್ವಾಗತ ಮಾಡಿಕೊಂಡಿದೆ.

ಕಳೆದ 15 ದಿನಗಳ ಹಿಂದೆ ನಗರದ ಶಹರ ಪೊಲೀಸ್ ಠಾಣೆಯ ಮಹಿಳಾ ಮುಖ್ಯ ಪೇದೆಗೆ ಕೊರೊನಾ ಸೊಂಕು ತಗುಲಿತ್ತು. ಗುಣಮುಖರಾಗಿ ಇವತ್ತು ಮುಖ್ಯ ಪೇದೆ ಕರ್ತವ್ಯಕ್ಕೆ ಹಾಜರಾಗಲು ಠಾಣೆಗೆ ಬಂದಾಗ ಎಸಿಪಿ ಅನುಷಾ ಮುಖ್ಯ ಪೇದೆಯನ್ನು ಸ್ವಾಗತಿಸಿಕೊಂಡರು. ಇದೇ ವೇಳೆ ಸ್ಥಳದಲ್ಲಿದ್ದ ಈ ಶ್ವಾನ ತನ್ನ ಸ್ನೇಹಿತೆ ಮುಖ್ಯ ಪೇದೆಯನ್ನು ಸ್ವಾಗತ ಮಾಡಿಕೊಂಡಿದೆ. ಹಲವು ವರ್ಷಗಳಿಂದ ಈ ಶ್ವಾನ ಠಾಣೆಯ ಎದುರಲ್ಲೇ ಇರುತ್ತೆ. ಇದಕ್ಕೆ ಸಾಕಿದವರು ಇದೇ ಠಾಣೆಯ ಪೇದೆಗಳು.

ಈ ಹಿನ್ನೆಲೆ ಪೇದೆಗಳು ಠಾಣೆಗೆ ಬರುತ್ತಿದ್ದಂತೆಯೇ ಅವರ ಅಕ್ಕ ಪಕ್ಕದಲ್ಲೇ ಈ ಶ್ವಾನ ಓಡಾಡಿಕೊಂಡು ಇರುತ್ತೆ. ಕಳೆದ 15 ದಿನಗಳಿಂದ ಈ ಮಹಿಳಾ ಮುಖ್ಯ ಪೇದೆ ಕಂಡಿರಲೇ ಇಲ್ಲ. ಇವತ್ತು ಠಾಣೆಗೆ ಮುಖ್ಯ ಪೇದೆ ಬರುತಿದ್ದಂತೆಯೇ ತನ್ನ ಬಾಲ ಅಲ್ಲಾಡಿಸುತ್ತ ಅಕ್ಕ ಪಕ್ಕಕ್ಕೆ ಬಂದು ನಿಂತಿದೆ. ಅಲ್ಲದೇ ಎಲ್ಲರೂ ಫೋಟೋಗೆ ಪೋಸ್ ಕೊಟ್ಟ ವೇಳೆ ತಾನೂ ಪೋಸ್ ಕೊಟ್ಟು ನಿಂತಿದೆ.