ಏನಾದರೊಂದು ಸಾಧಿಸೋ ಕನಸಿಟ್ಟುಕೊಳ್ಳದವರು ಬಹುಶಃ ಜಗತ್ತಿನಲ್ಲಿ ಯಾರೂ ಇರಲಿಕ್ಕಿಲ್ಲ. ಆದರೆ ಅಂತಹ ಕನಸಿಗಿಂತ ವಾಸ್ತವ ಕಠೋರವಾಗಿರುತ್ತೆ. ಕೂತಲ್ಲೇ ಚೆಂದದ ಕನಸು ಕಾಣೋದು ಸಲೀಸು. ಆದರೆ ಅದನ್ನ ನನಸು ಮಾಡಿಕೊಳ್ಳಬೇಕೆಂದರೆ ಕಲ್ಲುಮುಳ್ಳಿನ ಹಾದಿ ತುಳಿಯಬೇಕಾಗುತ್ತೆ. ಅವಮಾನ ಎದುರಿಸಿ, ಪದೇ ಪದೇ ಕಣ್ಣೀರಾಗಬೇಕಾಗುತ್ತೆ. ಆ ಘಳಿಗೆಯಲ್ಲಿ ಕುಸಿದು ಕೂತರೆ ಪರವಾಗಿಲ್ಲ. ಮೇಲೇಳಲು ಪ್ರಯತ್ನಿಸದಿದ್ದರೆ ಜಗತ್ತಿನ ಯಾವ ಶಕ್ತಿಯೂ ನಿಮ್ಮ ಬಳಿ ಸುಳಿಯೋದಿಲ್ಲ. ಬಹುಶಃ ಅಂತಹ ಸ್ಥಿತಿಯಿಂದ ಎದ್ದು ನಿಲ್ಲದೇ ಹೋಗಿದ್ದರೆ ಈ ವಿಶ್ವದ ಬಹಳಷ್ಟು ಗೆಲುವುಗಳು ಸಾಧ್ಯವಾಗುತ್ತಲೇ ಇರಲಿಲ್ಲ.
ಹಾಗೆ ಸೋಲನ್ನೇ ಗೆಲುವಿನ ಮೆಟ್ಟಿಲಾಗಿಸಿಕೊಂಡ ಖ್ಯಾತನಾಮರು ಅನೇಕರಿದ್ದಾರೆ. ಅದರಾಚೆಗೂ ವಿವಿಧ ಕ್ಷೇತ್ರಗಳಲ್ಲಿ ಇನ್ನೊಂದಷ್ಟು ರೋಲ್ ಮಾಡೆಲ್‍ಗಳಿವೆ. ಅದರಲ್ಲಿ ಅಮೆರಿಕದ ಖ್ಯಾತ ಲೇಖಕಿ, ಉದ್ಯಮಿ ಅರಿಯನ್ನಾ ಸ್ಟಾಸಿನೋಪೌಲಸ್ ಹೆಸರೂ ಉಲ್ಲೇಖಾರ್ಹ. ಈಕೆ ಅಮೆರಿಕನ್ ಲೇಖಕಿ. ಸರಿ ಸುಮಾರು ಹದಿನೈದಕ್ಕೂ ಹೆಚ್ಚು ಪುಸ್ತಕಗಳನ್ನು ಬರೆದಿರುವಾಕೆ. ಜೊತೆಗೆ ದಿ ಹಫಿಂಗ್ಟನ್ ಪೋಸ್ಟ್ ಸಹ ಸಂಸ್ಥಾಪಕಿಯೂ ಹೌದು. ಈಕೆ ಲೇಖಕಿಯಾಗಿ ನಡೆದು ಬಂದ ಆರಂಭಿಕ ಹಾದಿಯಲ್ಲಿ ಭರ್ಜರಿ ಸ್ವಾಗತ ಕೋರಿದ್ದದ್ದು ಸೋಲು ಮತ್ತು ಅವಮಾನಗಳು ಮಾತ್ರ.
ಈಕೆ ಮೊದಲ ಪುಸ್ತಕ ಬರೆದು ಅದು ಹೇಗೋ ಪ್ರಕಟಿಸಿದ್ದರು. ಆ ನಂತರ ಎರಡನೇ ಪುಸ್ತಕ ಬರೆದು ಅದೆಷ್ಟೇ ಅಲೆದಾಡಿದರೂ ಒಬ್ಬನೇ ಒಬ್ಬ ಪಬ್ಲಿಷರ್ ಕೂಡ ಪ್ರಕಟಿಸಲು ಮುಂದೆ ಬರಲಿಲ್ಲ. ಹಾಗಂತ ಅರಿಯನ್ನಾ ಪ್ರಯತ್ನ ನಿಲ್ಲಿಸಲಿಲ್ಲ. ಆಕೆ ಅದೆಷ್ಟು ಪ್ರಯತ್ನಿಸಿದ್ದರೆಂದರೆ ಸರಿ ಸುಮಾರು ಮೂವತ್ತೊಂಬತ್ತು ಪ್ರಕಟಣಾ ಸಂಸ್ಥೆಗಳು ಅವರ ಪುಸ್ತಕವನ್ನು ನಿರಾಕರಿಸಿದ್ದವು. ಆ ನಂತರವೂ ಒಂದು ಸಂಸ್ಥೆ ಪುಸ್ತಕವನ್ನು ಪ್ರಕಟಿಸಿತ್ತು. ನಂತರ ಅದರ ಗುಣಮಟ್ಟದ ಬಗ್ಗೆ ಟೀಕೆಗಳು ಬಂದವು.
ಆದರೂ ಪಟ್ಟು ಬಿಡದೆ ಮೂರನೇ ಪುಸ್ತಕ ಪ್ರಕಟಿಸಿದರು ನೋಡಿ ಅರಿಯನ್ನಾ… ಅದಕ್ಕೆ ವ್ಯಾಪಕ ಮೆಚ್ಚುಗೆ ಕೇಳಿ ಬಂದಿತ್ತು. ಒಂದಷ್ಟು ಓದುಗರೂ ಹುಟ್ಟಿಕೊಂಡರು. ಆ ಬಳಿಕ ಹದಿನೈದು ಪುಸ್ತಕ ಬರೆಯೋ ಹೊತ್ತಿಗೆಲ್ಲ ಅರಿಯನ್ನಾ ಇಷ್ಟದ ಲೇಖಕಿಯಾಗಿ ಹೊರಹೊಮ್ಮಿದ್ದರು. ನಂತರ ದಿ ಹಫಿಂಗ್ಟನ್ ಪೋಸ್ಟ್ ಮೂಲಕವೂ ಪ್ರಸಿದ್ಧಿ ಪಡೆದುಕೊಂಡಿದ್ದರು. ಆಕೆ ಏನಾದರೂ ಆರಂಭಿಕವಾದ ನಿರಾಕರಣೆ, ಅವಮಾನದಿಂದ ಕುಸಿದಿದ್ದರೆ ಲೇಖಕಿಯಾಗಿ ಹೆಸರು ಮಾಡಲು ಸಾಧ್ಯವೇ ಇರುತ್ತಿರಲಿಲ್ಲ.!
Leave a Reply