ಆಟೋಗೆ ಅಡ್ಡ ಬಂದ ಕಾರ್, ಸಿನಿಮಾ ಸ್ಟೈಲಲ್ಲಿ ಆಟೋದಿಂದ ಹಾರಿದ ಚಾಲಕ

ಚಿಕ್ಕಮಗಳೂರು: ಮುಖ್ಯರಸ್ತೆಯಲ್ಲಿ ಚಲಿಸುತ್ತಿದ್ದ ಆಟೋಗೆ ಕಾರ್ ಅಡ್ಡ ಬಂದಿದ್ದು, ಚಾಲಕ ಸಿನಿಮಾ ಸ್ಟೈಲಲ್ಲಿ ಆಟೋದಿಂದ ಹಾರಿದ್ದಾನೆ. ಮೈ ಜುಮ್ ಎನ್ನಿಸುವ ಈ ವಿಡಿಯೋ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.

ಕೊಪ್ಪ ತಾಲೂಕಿನ ಬಾಳಗಡಿ ರಸ್ತೆಯಲ್ಲಿ ಘಟನೆ ನಡೆದಿದ್ದು, ಮುಖ್ಯರಸ್ತೆಯಲ್ಲಿ ಆಟೋ ಬರುತ್ತಿದೆ, ಇನ್ನೊಂದೆಡೆ ರಸ್ತೆ ಬದಿಯಲ್ಲಿ ಕಾರ್ ನಿಂತಿದೆ. ಆಟೋ ಬರುವುದನ್ನು ನೋಡದ ಕಾರ್ ಚಾಲಕ ಇದ್ದಕ್ಕಿದ್ದಂತೆ ಮುಖ್ಯ ರಸ್ತೆ ಕಡೆಗೆ ಕಾರ್ ತಿರುಗಿಸಿದ್ದಾನೆ. ಹಿಂದೆ ಆಟೋ ವೇಗವಾಗಿ ಬರುತ್ತಿದ್ದರಿಂದ ನಿಯಂತ್ರಿಸಲು ಸಾಧ್ಯವಾಗಿಲ್ಲ. ಪರಿಣಾಮ ಕಾರಿನ ಮುಂಭಾಗಕ್ಕೆ ಡಿಕ್ಕಿ ಹೊಡೆದಿದೆ. ಈ ವೇಳೆ ಆಟೋ ಚಾಲಕ ಸಮಯಪ್ರಜ್ಞೆ ಮೆರೆದಿದ್ದಾನೆ.

ಕಾರಿಗೆ ಆಟೋ ಅಪ್ಪಳಿಸುತ್ತಿದ್ದಂತೆ ಇನ್ನೊಂದು ರಸ್ತೆಯ ಇನ್ನೊಂದು ಬದಿಗೆ ಬಂದಿದ್ದು, ರಸ್ತೆ ಪಕ್ಕದಲ್ಲಿ ನಿಂತಿದ್ದ ಅಂಬುಲೆನ್ಸ್ ವ್ಯಾನ್‍ಗೆ ಡಿಕ್ಕಿ ಹೊಡೆದಿದೆ. ಈ ವೇಳೆ ಚಾಲಕ ಆಟೋದಿಂದ ಹಾರಿ ಪ್ರಾಣ ಉಳಿಸಿಕೊಂಡಿದ್ದಾನೆ. ಕಾರ್ ತಪ್ಪಿಸಲು ಹೋಗಿ ನಿಂತಿದ್ದ ಅಂಬುಲೆನ್ಸ್‍ಗೆ ಆಟೋ ಡಿಕ್ಕಿ ಹೊಡೆದಿದೆ. ಈ ದೃಶ್ಯ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಜಿಲ್ಲೆಯ ಕೊಪ್ಪ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಪ್ರಕರಣ ನಡೆದಿದೆ.