ಅಪ್ರಾಪ್ತ ಮಗಳ ಮದ್ವೆಗೆ ವಿರೋಧ- ಪತ್ನಿಯನ್ನ ಕೊಂದ ಪತಿ

-ಕಂಠಪೂರ್ತಿ ಕುಡಿದಿದ್ದ ದಂಪತಿ

ಲಕ್ನೋ: ಅಪ್ರಾಪ್ತ ಮಗಳ ಮದುವೆಗೆ ವಿರೋಧಿಸಿದ ಪತ್ನಿಯನ್ನ ಪತಿ ಕೊಲೆ ಮಾಡಿರುವ ಘಟನೆ ಉತ್ತರ ಪ್ರದೇಶದ ಗೌತಮಬುದ್ಧ ಜಿಲ್ಲೆಯ ಮಂಗರೌಲಿ ಗ್ರಾಮದಲ್ಲಿ ನಡೆದಿದೆ.

ಬಿಹಾರ ಮೂಲದ ಗುಲ್ಜಾರ್ ಪತ್ನಿಯನ್ನು ಕೊಂದು ಪೊಲೀಸರು ಅತಿಥಿಯಾಗಿದ್ದಾನೆ. ಗುಲ್ಜಾರ್ ತನ್ನ ಅಪ್ರಾಪ್ತ ಪುತ್ರಿಯ ಮದುವೆ ನಿಶ್ಚಯ ಮಾಡಿದ್ದನು. ಆದ್ರೆ ಮದುವೆಗೆ ಬಾಲಕಿಯ ತಾಯಿ ತಾರಾ ದೇವಿ ವಿರೋಧ ವ್ಯಕ್ತಪಡಿಸಿದ್ದರು. ಈ ಸಂಬಂಧ ಮಧ್ಯೆ ಇಬ್ಬರ ಮಧ್ಯೆ ಜಗಳ ನಡೆದಿದ್ದು, ಕೋಪಗೊಂಡ ಗುಲ್ಜಾರ್ ಪತ್ನಿಯನ್ನು ಕೊಲೆ ಮಾಡಿದ್ದಾನೆ.

ಈ ಕುರಿತು ಮಾಹಿತಿ ನೀಡಿರುವ ಹಿರಿಯ ಪೊಲೀಸ್ ಅಧಿಕಾರಿ ರಣ್‍ವಿಜಯ್ ಸಿಂಗ್, ಸೋಮವಾರ ರಾತ್ರಿ ದಂಪತಿ ಜೊತೆಯಾಗಿ ಮದ್ಯ ಸೇವನೆ ಮಾಡಿದ್ದಾರೆ. ಈ ವೇಳೆ ಮಗಳ ಮದುವೆ ಪ್ರಸ್ತಾಪವಾಗಿ ಜಗಳ ನಡೆದಿದೆ. ಮಾತು ವಿಕೋಪಕ್ಕೆ ತಿರುಗಿದಾಗ ಗುಲ್ಜಾರ್ ಪತ್ನಿಯ ತೆಲೆಗೆ ಬಲವಾದ ವಸ್ತುವಿನಿಂದ ಹೊಡೆದು ಕೊಲೆಗೈದಿದ್ದಾನೆ, ಘಟನೆ ಸಂಬಂಧ ಪ್ರಕರಣ ದಾಖಲಿಸಿಕೊಂಡು, ಆರೋಪಿಯನ್ನು ಬಂಧಿಸಲಾಗಿದೆ ಎಂದು ತಿಳಿಸಿದ್ದಾರೆ.